ՀԱԿ-ի և ԲՀԿ-ի միջև կա Մարտի 1

Երեկ Աժ ՀԱԿ խմբակցության ղեկավարից հետաքրքրվել էին, թե նա կիսում է Արամ Մանուկյանի՝ վերջերս հայտնած այն տեսակետը, թե «Մարտի 1»-ի գործում որևէ քաղաքական ուժ չի մասնակցել: Նա պատասխանել է. «Ես իմ տեսակետը հայտնել եմ, միշտ էլ ասել եմ և շարունակում եմ պնդել, որ «Մարտի 1»-ի համար քաղաքական պատասխանատվություն կրում են բոլոր այն ուժերը, որոնք եղել են կոալիցիայի կազմում և կայացրել են համապատասխան որոշումներ արտակարգ դրություն մտցնելու մասին: Կա քաղաքական պատասխանատվություն, իրենք կրում են»:

Այսօր Լուրեր.com-ը զրուցեց ԱԺ ԲՀԿ խմբակցության քարտուղար Նաիրա Զոհրաբյանի հետ, ով նշեց, որ Մարտի 1-ի հետ կապված բոլոր հարցերին ԲՀԿ կուսակցության բոլոր անդամները պաշտոնապես և մշտապես իրենց գնահատականը հնչեցրել են։

«Գագիկ Ծառուկյանը ժամանակին հայտարարել է, որ թե՛ ինքը, թե՛ կուսակցությունը մեծապես շահագրգռված է, որ Մարտի 1-ի հետ կապված բոլոր հարցերը ստանան իրենց վերջնական ու սպառիչ պատասխանը։ Սրան ավելացնելու ես ոչ մի բան չունեմ»,–ասաց Զոհրաբյանը։

Նշենք նաև, որ «Առավոտ»–ի հետ զրույցում Զուրաբյանը, անդրադառնալով հարցին, թե «Մարտի 1»-ի դերակատարների այն ցուցակը, որը հրապարակել էր ՀԱԿ-ը, փոխվե՞լ է, փոխվե՞լ է այն ցուցակը, որտեղ կար նաև Գագիկ Ծառուկյանի անունը՝ ՀԱԿ համակարգողը պատասխանեց. «Այդ ցուցակը վերաբերում էր լրիվ այլ հարցի: Դա լրիվ այլ հարց էր. փաստահավաք խումբը, երբ սկսեց հետաքննություն անցկացնել այդ ցուցակի վերաբերյալ ինֆորմացիան ստուգելու համար, պաշտպանության նախարարությունը թույլ չտվեց, փակեցին: Այնպես որ մենք կարող ենք միայն մի բան ասել, որ իշխանությունները խոչընդոտել են փաստերի հավաքման գործընթացին: Թե իրականում կոնկրետ այդ էպիզոդում ով ինչ պատասխանատվություն է կրում, մենք դեռ չենք կարող ասել: Դա մի գործընթաց է, որը մի օր անպայման կհասնի մինչև վերջ»:

Հ.Գ. Հատկանշանական է, որ որքան էլ խոսվում է ՀԱԿ-ԲՀԿ հնարավոր համագործակցության, ԲՀԿ-ՀԱԿ միասնական թեկնածուի մասին, միևնույն է, ՀԱԿ-ի և ԲՀԿ-ի միջև կա Մարտի 1:

ԲՀԿ-ի և ՀԱԿ-ի միջև առկա հակասություններն ակնհայտ են դառնում հատկապես ԱԺ ՀԱԿ խմբակցության պատգամավոր Նիկոլ Փաշինյանի անընդհատ արվող այն հայտարարություններից, որ ինքը ՀԱԿ-ԲՀԿ հնարավոր համագործակցության մասին հստակ արտահայտվել է, իր գնահատականներում որևէ բան չի փոխվել, և իր արած բոլոր հայտարարություններն ուժի մեջ են: