Հայաստանը միջազգային կարգի թիմեր կունենա

Սույն թվականի նոյեմբերի 9-ից 17-ը Հայաստանում էր Շվեյցարիայի միջազգային զարգացման և համագործակցության գործակալության փորձագետ Անտոն Բյիլանգը:

Ա. Բյիլանգը ՀՀ ԱԻՆ մասնագետների հետ քննարկել է ՀՀ–ում Շվեյցարիայի միջազգային զարգացման և համագործակցության գործակալության հետ համատեղ «Արագ արձագանքման միջին փրկարարական թիմերի ստեղծումը շրջաններում» պիլոտային ծրագրի իրականացման խնդիրը:

Ա. Բյիլանգը ՀՀ ԱԻՆ աշխատանքային խմբի ներկայացուցիչների հետ այցելել է Շիրակի մարզ, որտեղ անց է կացվել վարժանք՝ փրկարարների և ուսուցում անցած բժիշկների մասնակցությամբ:

Ուսումնասիրվել են հատուկ փրկարար ջոկատի և ՀՀ ԱԻՆ Ճգնաժամային կառավարման պետական ակադեմիայի հնարավորությունները:

Ռիսկերի գնահատումից հետո, որոշում է կայացվել ծրագիրը իրականացնել Երևանում, Շիրակի և Սյունիքի մարզերում: Ծրագրի իրականացման արդյունքում Երևանում, Շիրակի և Սյունիքի մարզերում ստեղծվելու են INSARAG–ի չափանիշներին համապատասխան միջին փրկարարական թիմեր, որոնք կարող են արձագանքել խոշոր աղետներին և իրականացնել փրկարարական աշխատանքներ:

Ծրագիրը անց է կացվելու 2013–2014 թվականների ընթացքում: Ստեղծվող փրկարարական թիմերը ապահովվելու են Շվեյցարիայի միջազգային զարգացման և համագործակցության գործակալության կողմից անհրաժեշտ գույքով և փրկարարական տեխնիկական միջոցներով և համատեղ ուսուցմամբ՝ ՀՀ ԱԻՆ մասնագետների հետ միասին:

Սույն ծրագիրը հաջող իրականացնելուց հետո պլանավորվում է այն շարունակել երկրորդ փուլով, որում ընդգրկվելու են ՀՀ Տավուշի, Կոտայքի և Գեղարքունիքի մարզերը:

Նոյեմբերի 16–ին Ա. Բյիլանգին և ՀՀ ԱԻՆ աշխատանքային խմբի անդամներին ընդունել է ՀՀ արտակարգ իրավիճակների նախարարի ժամանակավոր պաշտոնակատար, փոխնախարար Հ. Մխիթարյանը:

Հանդիպման ընթացքում ամփոփվել են այս ոլորտում կատարված աշխատանքները: