Անմահներ. նկարազարդ մի ժողովածու՝ Հայաստանի և հայերի մասին

Նոյեմբերի 16-ին Հայաստանի Հանրապետության սփյուռքի նախարար Հրանուշ Հակոբյանն ընդունեց ամերիկահայ մշակութաբան Ալիս Նավասարգյանին:

Ա. Նավասարգյանը ծնվել է Իրանում՝ Թավրիզում: Նրանց ընտանիքում գերակայել են հայկական ավանդույթներն ու մշակույթը, ինչը նշանակալի գործոն է դարձել նրա հետագա գործունեության ընտրության հարցում: Ալիսը երաժշտություն և մշակույթի պատմություն է ուսանել Թավրիզում, Սպահանի համալսարանում ստացել է հայագիտության և պատմության բակալավրի աստիճան: Ալիս Նավասարգյանը հեղինակել է «Իրան-Հայաստան. Ոսկի կամուրջներ», «Բեմին նվիրված հայուհիներ» գրքերը:

Նա ՀՀ սփյուռքի նախարարին ներկայացրեց իր հեղինակած նոր գիրքը՝ «Անմահներ. նկարազարդ մի ժողովածու՝ Հայաստանի, հայերի և իրանահայերի մասին» վերնագրով: Գրքում ներկայացված է հայ ժողովրդի դարավոր պատմությունը՝ արվեստը, ծեսերը, հեքիաթները, լեգենդներն ու հավատալիքները, նշանավոր պատմական հերոսներն ու գործիչները: Գիրքը բացառիկ հնարավորություն է՝ օտարներին արժանվույնս պատմելու հայի ու Հայաստանի մասին:

ՀՀ սփյուռքի նախարարը, ողջունելով Ա. Նավասարգյանին, մասնավորապես նշեց. «Ուրախ եմ մեր նախարարությունում ընդունելու մի մարդու, ով իր կյանքը նվիրել է հայ արվեստին՝ հրատարակելով մնայուն արժեք ներկայացնող երեք գիրք, որոնք ներկայացնում են մեր մշակույթը, պատմությունն ու քաղաքականությունը: Ինձ համար էական է նրա գործունեությունը հեռավոր Ամերիկայում, քանի որ ինչ էլ ստեղծի՝ գրի, հավաքագրի, նվիրված է լինելու Հայաստանին ու հային: Հայապահպանությունը մեր հիմնական խնդիրն է Սփյուռքում, մենք պետք է պահպանենք այն ամենը, ինչով հպարտանում ենք այսօր, իսկ մեր հպարտության առարկան օտարի հիացմունքի պատճառն է»:

Այնուհետև նախարարը հյուրին ներկայացրեց ՀՀ սփյուռքի նախարարության գործունեությունը, մասնավորապես այն ծրագրերը, որոնք միտված են Սփյուռքի հայ համայնքներում հայկական մշակույթի, ավանդույթների պահպանմանը, հանրահռչակմանը: