Ավտովթար Ուջան գյուղի ավտոճանապարհին. մեկ զոհ, երկու վիրավոր

Այսօր՝ նոյեմբերի 16-ին, ավտովթար է տեղի ունեցել Արագածոտնի մարզում: Ժամը 17:20-ի սահմաններում, Գյումրի-Երևան ավտոճանապարհի 75 կմ հատվածում՝ Ուջան գյուղի մոտ, բախվել են «Դեյվու» մակնիշի 13 ԼՍ 293 և «Վազ 2107» մակնիշի 16 ՍՕ 712 համարանիշի ավտոմեքենաները:

Ինչպես հայտնում է shamshyan.com-ը, վթարի վայր են ժամանել ՀՀ արտակարգ իրավիճակների նախարարության փրկարար ծառայության Արագածոտնի մարզի փրկարարական վարչության Աշտարակի հրշեջ փրկարարական ջոկատը՝ մեկ մարտական հաշվարկով՝ Արագածոտնի փրկարար վարչության պետ Շամիր Շամիրյանի գլխավորությամբ:

Հրշեջ փրկարարները ավտոմեքենայի մոտից դուրս են բերել «Դեյվուի» վարորդին՝ մահացած վիճակում: Իսկ ևս երկու հոգի տեղափոխվել են Աշտարակի հիվանդանոց:

Դեպքի վայր են ժամանել Ոստիկանության Աշտարակի բաժնի օպերատիվ խումբը՝ Աշտարակի ոստիկանապետ Արթուր Արիստակեսյանի գլխավորությամբ: Դեպքի վայրում են Ճանապարհային ոստիկանության 2-րդ սպայական գումարտակի 2-րդ վաշտի 1-ին դասակի աշխատակիցները՝ վաշտի հրամանատար Նիկողայոս Եղիազարյանի և գումարտակի հրամանատարի տեղակալ Սամսոն Սարգսյանի գլխավորութամբ:

Այս պահին Ոստիկանության քննչական գլխավոր վարչության Արագածոտնի մարզի քննչական բաժնի քննիչները՝ բաժնի պետ Մարատ Դուրյանի գլխավորությամբ, վթարի վայրում քննչական գործողություններ են կատարում: Ավտոմեքենաներից գազի արտահոսքը հրշեջ-փրկարարների կողմից կասեցվել է:

Քննիչ Դավիթ Կոստանդյանի հանձնարարականով այս պահին պարզվում է վարորդների, մահացած անձի և վիրավոր անձանց ինքնությունը: Ըստ տեղեկությունների, «Վազ 2107»-ի վարորդը վթարից հետո դիմել է փախուստի: