Այսօր վարչապետ Տիգրան Սարգսյանի հարբելու օրն է (տեսանյութ)

1941 թվականից ամբողջ աշխարհում տոնվող Երիտասարդության և ուսանողության միջազգային օրը անցյալ տարի հիշարժան դարձավ նաև Հայաստանում: Հիշարժան՝ ոչ միայն նրանով, որ ուսանողների միջազգային օրն է, այլ նրանով, որ նշանավորվեց ՀՀ վարչապետ Տիգրան Սարգսյանի սկանդալային ելույթով:

Անցյալ տարի ՀՀԿ-ի և Հայաստանի երիտասարդական հիմնադրամի՝ Ուսանողության օրվա կապակցությամբ կազմակերպած՝ երգիչ Թաթայի համերգի ժամանակ ՀՀ վարչապետ Տիգրան Սարգսյանը զվարճացրել էր ներկաներին: Նա համերգի ժամանակ ելույթի խոսք էր խնդրել, շնորհավորել երիտասարդներին տոնի առիթով, հուզմունքից փոքր-ինչ ճոճվել և ներկաներին հասկացրել, որ Հայաստանի վաղվա օրը կապված է երիտասարդների մտքի և հոգու զորության հետ: Համերգի ներկաների մոտ տպավորություն էր ստեղծվել, թե նա մինչև համերգին ներկայանալը հիշել էր իր երիտասարդության օրերը և դրանք նշանավորել բաժակաճառերով: Թեև միջադեպից մեկ տարի է անցել, թեև սկանդալային ելույթը վարչապետը պատճառաբանել է տեխնիկական խնդիրներով, բոլորն են հիշում նրա ելույթը և հայտնի «շախմատի ոլոլորտում» արտահայտությունը:

Այսօր, ինչպես անցած տարի, Հայաստանի երիտասարդական հիմնադրամը և ՀՀԿ երիտասարդական կազմակերպությունը, Կ. Դեմիրճյանի անվան մարզահամերգային համալիրում Երիտասարդության համաշխարհային օրվա և Ուսանողության միջազգային տոնի շրջանակում, կկազմակերպեն Հարութ Փամբուկչյանի համերգը: Իսկ ամենասպասվածն այն է, որ միջոցառմանը ներկա կլինի նաև ՀՀ վարչապետ Տիգրան Սարգսյանը: Թե ինչ ելույթով այսօր կազմակերպված համերգը կնշանավորվի՝ չենք կարող ասել: Կարող ենք միայն հույս հայտնել, եթե, այնուամենայնիվ, վարչապետն այսօր էլ հիշի իր երիտասարդության և ուսանողության տարիները, ելույթով հանդես չի գա: Իսկ եթե որոշի անսպասելիորեն «խոսել», ապա սկանդալային ելույթը չի փորձի պատճառաբանել տեխնիկական խնդիրներով:

1in.am