Թուրքիայի խորհրդարանը քաղաքացիներին դատարաններում մայրենի լեզվով պաշտպանվելու իրավունք է վերապահել

Թուրքիայի խորհրդարանի մարդու իրավունքների հանձնաժողովն ընդունել է քաղաքացիներին մայրենի լեզվով պաշտպանվելու իրավունքի մասին օրինագիծը: Ինչպես հաղորդում է «Արմենպրես»-ը՝ վկայակոչելով թուրքական ԶԼՄ-ները, այսուհետև Թուրքիայում բնակվող յուրաքանչյուր քաղաքացու իրավունք է վերապահվում դատական գործընթացներում պաշտպանվել իր մայրենի լեզվով:

Թուրքական բանտերում գտնվող հազարավոր քրդերի դատական գործերը մնում են չլուծված, քանի որ շատ դատապարտյալներ չեն խոսում թուրքերեն և պահանջում են դատական գործընթացներում թույլ տալ իրենց պաշտպանվել մայրենի լեզվով, ինչը մինչ այժմ մերժվում էր պատճառաբանությամբ, որ Թուրքիայի պետական լեզուն թուրքերենն է:

Հանձնաժողովը հաստատել է նաև բանտում դատապարտյալներին՝ իրենց ամուսինների և կանանց հետ հանդիպելու հնարավորություն ընձեռող օրինագիծը: