Ռուսաստանը, Չինաստանը և Իրանը ռազմածովային զորավարժություններ կանցկացնեն, որոնց կմասնակցի նաև Ադրբեջանը

Հնդկական օվկիանոսի հյուսիսային հատվածում Իրանի, Ռուսաստանի և Չինաստանի մասնակցությամբ «Ծովային անվտանգության գոտի 2024» ռազմածովային զորավարժությունների հիմնական փուլը կմեկնարկի մարտի 12-ին, հայտնում է իրանական Tasnim գործակալությունը։

Զորավարժություններին կմասնակցեն նաև Ադրբեջանի, Ղազախստանի, Օմանի, Պակիստանի և Հարավային Աֆրիկայի զինված ուժերի ներկայացուցիչներ, ասվում է հրապարակման մեջ։

Tasnim-ը նշում է, որ զորավարժությունների նպատակներն են տարածաշրջանում անվտանգության ամրապնդումը, միջազգային ծովային առևտրի պաշտպանությունը, ծովահենության և ահաբեկչության դեմ պայքարը, ծովային գործողությունների ոլորտում օպերատիվ և մարտավարական փորձի փոխանակումը:

2023 թվականին Ռուսաստանի, Չինաստանի և Իրանի «Ծովային անվտանգության գոտի-2023» եռակողմ զորավարժությունները տեղի են ունեցել մարտի 16-17-ը՝ Արաբական ծովում՝ իրանական Չահբեհար նավահանգստի մոտ։