Փաշինյանը ոչ միայն միակողմանի զիջման է գնում, այլ դեռ մի բան էլ ասում է, որ սահմանները «ֆիքսված չեն». ադրբեջանագետ

Ադրբեջանագետ Տաթևիկ Հայրապետյանը գրել է.

«Ադրբեջանական քարոզչադաշտի կարկառուն ներկայացուցիչ Թոֆիգ Զուլֆուգարովը նաև վրացական տեղեկատվական, ընդգծված ադրբեջանամետ հարթակներում է նշում, թե ինչպիսի պահանջների ցանկ են ներկայացրել հայկական կողմին՝ խոստովանելով, որ Ադրբեջանը ոչ միայն չի պատրաստվում դրանցից հրաժարվել, այլև ակտիվ առաջ է մղելու։

Եվ՛ ադրբեջանական քարոզչադաշտի ներկայացուցիչը, և՛ ՀՀ կառավարության ղեկավարը հարցականի տակ են դնում ՀՀ–ի տարածքային ամբողջականությունը՝ նշելով, որ դա «ֆիքսված» չէ:

Օրեր առաջ Սեյրան Օհանյանի հարցին ի պատասխան Փաշինյանը նշել էր. «...դուք ասում եք՝ վստա՞հ եք, որ Ադրբեջանը մեր տարածքներից հետ է գնալու, ես էլ ասում եմ՝ ո՞րն է մեր տարածքը, կարո՞ղ եք ցույց տալ։ Մենք ժողովրդին չենք վախեցնում, այլ ասում ենք ճշմարտությունը...Երբ ասում եք, վստահ եք, որ Ադրբեջանը դուրս է գալու մեր տարածքից, նախ այդ հարցի պատասխանը տալու ու այդ հարցը լուծելու համար, մենք պետք է ֆիքսենք, թե որն է մեր տարածքը։

Հենց այսպես բառ բառ կրկնվում են Փաշինյանի ու Ադրբեջանի թեզերը...

Սա մեծ սուտ է, որն ինտենսիվորեն փորձում են մատուցել հայ հանրությանը: Կան հստակ սահմաններ, կան քարտեզներ, բայց Ադրբեջանի դրանցից որևէ մեկին համաձայն չէ: Ու այդ ֆոնին ՀՀ ղեկավարը ոչ միայն միակողմանի զիջման է գնում, այլ դեռ մի բան էլ ասում է, որ ՀՀ սահմանները «ֆիքսված չեն», բայց չգիտես ինչի իր համար Ադրբեջանի սահմանները շա՜տ «ֆիքսված են»»: