Ադրբեջանի ու Հայաստանի միջև դե ֆակտո խաղաղություն է. Հաջիև

«Բաքուն շրջել է այդ էջը և ապահովում է խաղաղությունն ու անվտանգությունը»,-չինական Phoenix հեռուստաալիքին տված հարցազրույցում ասել է Ադրբեջանի նախագահի օգնական, նրա վարչակազմի արտաքին քաղաքականության բաժնի ղեկավար Հիքմեթ Հաջիևը։

«Դա պետք է որ շատ դժվար լիներ, բայց երբեմն անհրաժեշտ է դառնում տեղում խաղաղություն ապահովել։ Այժմ Հայաստանն ու Ադրբեջանը ավելի քան երբևէ մոտ են խաղաղությանը։ Վերջին վեց ամիսները հայ-ադրբեջանական սահմանին եղել են երկու երկրների պատմության մեջ ամենահանդարտ ամիսները»,- ասել է Հաջիևը։

«Մենք ականատես ենք եղել ԵԱՀԿ Մինսկի խմբի նախագահությանը, որը 30 տարի բանակցել է, բայց առանձնահատուկ արդյունքի չի հասել։ Մենք հեռու էինք խաղաղությունից: Հիմա խաղաղությունը մոտ է։ Տեղում դե ֆակտո խաղաղություն է։ Ադրբեջանի տեսլականն է կովկասյան տարածաշրջանը վերածել խաղաղության և համագործակցության տարածաշրջանի»,-ասել է Հաջիևը։