Մենք լավ առաջընթաց ունենք խաղաղության պայմանագրի հարցում, բայց կա մի բայց. Հաջիև

«Մենք լավ առաջընթաց ունենք խաղաղության պայմանագրի հարցում, բայց Ադրբեջանի մոտեցումն այն է, որ խաղաղությունը պետք է լինի Բաքվի և Երևանի միջև, քանի որ այս տարածաշրջանը պատկանում է մեզ»։ Այս մասին չինական Phoenix հեռուստաալիքին տված հարցազրույցում ասել է Ադրբեջանի նախագահի օգնական, նրա վարչակազմի արտաքին քաղաքականության բաժնի ղեկավար Հիքմեթ Հաջիևը։

«Մենք ձևակերպեցինք Հայաստանի Հանրապետության հետ խաղաղության պայմանագրի 5 հիմնարար սկզբունքները։ Մենք լավ առաջընթաց ունենք խաղաղության պայմանագրի հարցում, բայց Ադրբեջանի մոտեցումն այն է, որ խաղաղությունը պետք է լինի Բաքվի և Երևանի միջև, քանի որ այս տարածաշրջանը պատկանում է մեզ։ Խաղաղությունը Վաշինգտոնում, Բրյուսելում կամ Փարիզում չէ։ Խաղաղությունն այստեղ է՝ հարավկովկասյան տարածաշրջանում, երկու երկրների միջև։ Մենք տեսնում ենք, որ առաջ ենք շարժվում, բայց կան որոշակի քաղաքական գործիքներ, որոնք բացասաբար են անդրադառնում տարածաշրջանային համագործակցության և խաղաղության օրակարգի վրա»,- ասել է Հաջիևը։

Նրա խոսքով, Բաքվի օրակարգն այն է, որ խաղաղ գործընթացը պետք է երկկողմանի լինի։

«Պետք է լինի տարածաշրջանային պատասխանատվություն, նախաձեռնություն և համագործակցություն։ Բաքվի և Երևանի միջև պետք է խաղաղություն լինի։ Մենք պետք է հասկանանք միմյանց խնդիրները, շրջենք առճակատման էջը և շարժվենք առաջ»,- ասել է Ալիևի օգնականը։