50 Cent-ի նախկին ընկերուհին ռեփերին մեղադրել է բռնաբարության մեջ

Ռեփեր 50 Cent-ի նախկին ընկերուհին՝ դերասանուհի և մոդել Դաֆնի Ջոյը, մեղադրել է արտիստին բռնաբարության և ընտանեկան բռնության մեջ։ Աղջիկը համապատասխան հայտարարությունն արել է Instagram-ում։

Հրապարակման մեջ Ջոյը հայտարարել է իր նախկին սիրեցյալի անպարկեշտ պահվածքի մասին, սակայն որևէ ապացույց չի ներկայացրել: Դերասանուհու խոսքով՝ ռեփերը «քաոս ու խելագարություն» է բերել իր կյանք և «ամբողջությամբ ոչնչացրել է» իր հույսերը։

«Մենք տեղափոխվեցինք Նյու Յորք, որպեսզի կարողանաս ժամանակ անցկացնել որդուդ հետ, բայց դու նրան տեսակցել ես երկու տարվա ընթացքում 10 անգամ, թեև ապրում էիր մեզանից ընդամենը մի քանի կիլոմետր հեռավորության վրա: Ես հոգնել եմ մեր տղայի համար քո իմիջը պահպանելուց՝ իմիջ, որին դու արժանի չես։ Հիշիր այն չարությունը, որն արեցիր, երբ բռնաբարեցիր ինձ և ֆիզիկական ուժ գործադրեցիր իմ նկատմամբ։ Դու այլեւս չես կարող ինձ ճնշել։ Դու ամբողջովին ոչնչացրել ես իմ հույսերը, որ կարող ես դառնալ ընտանիքի գլուխ»,- գրել է մոդելը։

Որոշ ժամանակ անց ռեփերի ներկայացուցիչները պատասխանել են մեղադրանքներին՝ դրանք անվանելով «կեղծ և անհիմն»։ Ինքը՝ երաժիշտը, կարծում է, որ մոդելը նման հայտարարություն է արել միայն իրենց 12-ամյա որդու նկատմամբ լիարժեք խնամակալություն ստանալու համար։