Հայաստանում Ֆրանսիայի դեսպան. Թուրքիան տեղ չունի Եվրոմիությունում

Ֆրանսիան մնում է իր դիրքորոշմանը, որ Թուրքիան չպետք է անդամակցի Եվրոպական Միությանը: Այսօր այս մասին մամլո ասուլիսի ժամանակ հայտարարել է Հայաստանում Ֆրանսիայի դեսպան Անրի Ռենոն։ Հաղորդում է Regnum լրատվականը։

«Առաջին հիմնական պատճառը, թե ինչու Թուրքիան չի կարող ԵՄ անդամ դառնալ, այն է, որ այդ երկիրը չի գտնվում աշխարհագրորեն Եվրոպայում», - ասել է դիվանագետը: Ըստ նրա, Թուրքիայի դերը միջազգային հանրության մեջ շատ կարեւոր է, սակայն Թուրքիան իր առաքելությունը պետք է իրականացնի ԵՄ ընտանիքից դուրս։ Միեւնույն ժամանակ, Անրի Ռենոն ավելացրել է, որ իրենք չպետք է մոռանան Թուրքիայի և Ֆրանսիայի բարեկամական և դաշնակցային հարաբերությունները։ «Թուրքիայի ԵՄ անդամակցության վերաբերյալ Նիկոլա Սարկոզիի դիրքորոշումը հայտնի է և այն չի փոխվել»,-եզրափակել է Ֆրանսիայի դեսպանը։

Ինչպես ավելի վաղ հաղորդել էր Regnum լրատվական գործակալությունը, Երևանում պետական այցով ժամանած Ֆրանսիայի նախագահ Նիկոլա Սարկոզին հայտարարել էր, որ Թուրքիայի ԵՄ անդամակցության վերաբերյալ իր դիրքորոշումը մնում է նույնը: «Թուրքիան կարևոր դեր է իրականացնում տարածաշրջանում, ինչպես նաև Արևելքի և Արևմուտքի միջև կամուրջ է հանդիսանում, սակայն դա ԵՄ շրջանակներից դուրս է գտնվում»։