Ամերիկյան նավաստիները ծովահեններից փրկել են իրանցիների

ԱՄՆ ռազմածովային ուժերի զինծառայողները գերությունից ազատել են մի խումբ պարսիկների՝ Արաբական ծովում։

Ինչպես հունվարի 6-ին հաղորդել է "Reuters"-ը՝ հղելով Պենտագոնին, "Ջոն Սթեննիս" ավիակրի նավաստիները ձերբակալել են 15 ծովահենների, հավանաբար, սոմալիցիների։ Միևնույն ժամանակ գերությունից ազատվել են Իրանի 13 քաղաքացի։ Ինչպես հաղորդվում է, նրանք բոլորն էլ արդեն մեկնել են հայրենիք իրենց նավով, որը նույնպես զավթել էին ծովահենները։

Հատկանշական է այն փաստը, որ Թեհրանը սպառնացել էր ԱՄՆ պատասխան գործողությունների դիմել, եթե այս նույն ավիակիրը վերադառնա Պարսից ծոցի շրջան։

Նշենք, որ "Ջոն Սթեննիս" ատոմային ավիակիրը տեղակայված է Բահրեյնում և մասնակցում է ԱՄՆ 5-րդ նավատորմի գործունեության, որի գլխավոր խնդիրը Պարսից ծոցում նավագնացության անկախության և անցանելիության ապահովումն է։