Ռուսաստանն ու Թուրքիան համաձայնության չեկան Սիրիայի հարցում

Մոսկվան և Անկարան չեն կարողացել ընդհանուր հայտարարի գալ սիրիական հակամարտության կարգավորման հարցում: Ռուսաստանի և Թուրքիայի ԱԳ ղեկավարներին լրացուցիչ խորհրդակցություն է սպասվում այդ հարցում. փոխանցում է Интерфакс-ը:

Երկուշաբթի օրը ՌԴ նախագահ Վլադիմիր Պուտինը մեկօրյա աշխատանքային այցով այցելել էր Թուրքիա՝ վարչապետ Էրդողանի հրավերով մասնակցելու համար ռուս-թուրքական համագործակցության խորհրդի 3-րդ նիստին: Հանդիպման ընթացքում կողմերը քննարկել են երկկողմ համագործակցության բոլոր ոլորտները, ինչպես նաև միջազգային խնդիրները՝ անդրադառնալով այդ թվում Սիրիայի հակամարտությանը:

Նախագահ Պուտինը այցից հետո նշել է, որ Մոսկվան և Անկարան տարակարծիք են հակամարտության կարգավորման մեթոդների շուրջ: Նա նաև նշել է, որ Թուրքիայի և Ռուսաստանի ԱԳ ղեկավարներն այդ հարցով լրացուցիչ հանդիպումներ են ունենալու:

Պուտինը Ստամբուլում մամլո խորհրդակցության ժամանակ հայտարարել է, որ վերջին շրջանում թուրք-սիրիական սահմանին տեղի ունեցած դեպքերով պայմանավորված՝ կիսում է Թուրքիայի անհանգստությունը, սակայն զսպվածության կոչ է անում: Պուտինը կարծում է, թե Սիրիայից Թուրքիայի տարածք արձակված արկերը պատահականություն են եղել, որ Սիրիան հիմա իր այս վիճակում հարևանների վրա հարձակվելու տրամադրվածություն չի կարող ունենալ: «Մենք կիսում ենք Թուրքիայի անհանգստությունը և շատ լավ հասկանում ենք թուրքական կառավարության և թուրք ժողովրդի զգացմունքերը, սակայն անհրաժեշտ է զսպվածություն ցուցաբերել»,-ասել է Վլադիմիր Պուտինը:

Պուտինը հավելել է նաև, որ Սիրիայի հետ սահմանին Patriot տիպի հրթիռների տեղակայումը ավելի է լարում իրավիճակը: «Ռուսաստանը Թուրքիայի հետ ինտենսիվ կերպով աշխատելու է իրավիճակը կարգավորելու խնդրի շուրջ»,-եզրափակել է Պուտինը: