Իրանի և Թուրքիայի դիրքորոշումները ղարաբաղյան կոնֆլիկտի վերաբերյալ «որոշակի հարցերում շատ մոտ են». Ալի Լարիջիանի

«Թուրքիան եւ Իրանը մահմեդական եւ եղբայրական պետություններ են, ուստի պետք է, որ տարածաշրջանային բոլոր խնդիրները լուծվեն համակարգված», - ասել է Թուրքիա պաշտոնական այցով մեկնած Իրանի խորհրդարանի նախագահ Ալի Լարիջիանին՝ թուրքական «Անադոլու» լրատվականին տված հարցազրույցում։

Ինչ վերաբերում է Ղարաբաղյան հակամարտությանը Լարիջիանին ասել է, որ այդ խնդրի կարգավորման հարցով զբաղվում է ԵԱՀԿ Մինսկի խումբը։ Սակայն, նա ասել է. «Որքան ես գիտեմ, Ադրբեջանը ցանկանում է հասնել հակամարտության լուծմանը այդ ձևաչափով»։ 

Հատկանշական է, որ ադրբեջանական կողմն արդեն մի քանի տարի է քննադատական վերաբերմունք է դրսևորում ԵԱՀԿ Մինսկի խմբի միջնորդական գործունեության նկատմամբ՝ համարելով այն անարդյունավետ։ 

Միևնույն ժամանակ Ալի Լարիջանին նշել է, որ լավագույն տարբերակը կլինի այն, եթե այդ խնդիրները կարգավորվեն տարածաշրջանի երկրների միջոցով։

«Լեռնային Ղարաբաղի հակամարտությունն այժմ դարձել է միջազգային կոնֆլիկտ, սակայն Իրանը նույնպես պատրաստ է իր ներդրումն ունենալ խնդրի կարգավորման հարցում։ Կարևորն այն է, որ հակամարտության կարգավորումը չվնասի հակամարտող երկրների շահերը և խնդիրը կարգավորվի տարածքային ամբողջականության հիման վրա», – ասել է Լարիջիանին։ 

Անդրադառնալով Ղարաբաղյան հակամարտությանը՝ Լարիջիանին հայտարարել է որ Անկարայի ու Թեհրանի դիրքորոշումները այդ խնդրի հետ կապված «որոշակի հարցերում նույնն են»։

Հաղորդում է «Regnum» լրատվական գործակալությունը։