Ռուս ռազմական փորձագետները կարծում են, որ Patriot հրթիռներն ուղղվելու են Իրանի դեմ

Ռուսական Риа Новости տեղեկատվական գործակալությունում խորհրդակցություն է տեղի ունեցել Թուրքիայում հրթիռների տեղակայման թեմայի շուրջ: Խորհրդակցությանը մասնակցած ռուս ռազմական և քաղաքական մասնագետները նշել են, որ Թուրքիայում հթրիռներ տեղակայելու հիմնական նպատակը ոչ թե Սիրիան է, այլ՝ Իրանը: Նրանց կարծիքով՝ Սիրիան ի վիճակի չէ Թուրքիայի հետ պատերազմական գործողությունների մեջ մտնել: Նրանց կարծիքով՝ հրթիռների տեղակայման հիմնական նպատակը ՆԱՏՕ-ի փորձն է՝ հնարավորինս մոտ գտնվել Իրանին:

Աշխարհաքաղաքական հետազոտությունների ինստիտուտի տնօրեն գեներալ Լեոնիդ Իվաշովի խոսքերով՝ Թուրքիայի ռազմական ներուժը կրկնակի գերազանցում է Սիրիայի ռազմական կարողությանը:

«Ո՞ւմ մտքով պետք է անցնի, որ քաղաքացիական պատերազմի մեջ ներքաշված Սիրիան, որն իր բոլոր ռեսուրսներն է գործադրում այդ պայքարի մեջ, այսօր որոշել է հարձակվել Թուրքիայի վրա: Չեմ կարծում, որ թուրքերը լուրջ են վերաբերվում Սիրիայի հարձակմանը: Քահրամանմարաշում Patriot հրթիռների տեղակայումը միայն հնարավորություն է նախաձեռնում Սիրիա ներխուժելու համար, ինչին մինչ օրս խանգարում էր Ռուսաստանի վետոն»,-ասել է Իվաշովը:

Գեներալը նշել է նաև, որ նա համամիտ է այն կարծիքի հետ, որ Patriot զենիթա-հրթիռային համակարգի տեղակայումն ուղղված է Իրանի բալիստիկ հրթիռների լիկվիդացմանը: «Ես վստահ եմ, որ այդ համակարգը չի տեղակայվել Սիրիայի արձակած հրթիռներից պաշտպանվելու համար»,-ասել է նա: