«Բորժոմի»-ի արտադրող ընկերությունը կգնեն ռուսները

«Բորժոմի» հանքային ջրի արտադրողի՝ IDS Borjomi ընկերության բաժնետոմսերի վերահսկիչ փաթեթը մինչև 2012 թվականի վերջ կգնի Միխայիլ Ֆրիդմանի «Ալֆա Գրուպ»-ի հետ կապված կառույցը: Այս մասին, անանուն աղբյուրներին հղում կատարելով, հայտնում է Коммерсантъ-ը:

Պարբերականի տվյայներով՝ գործարքի գինը կարող է կազմել մոտ 300 մլն դոլար: Որպես բաժնետոմսերի վաճառող՝ հանդես կգա վրացի հանգուցյալ  գործարար Բադրի Պատարկացիշվիլիի ընտանիքը, որը կմնա «Բորժոմիի» փոքրամասնական սեփականատերը: Այն մասին, որ «Բորժոմի»-ի համար արդեն գնորդ են որոնում, հայտնի դարձավ 2012 թվականի օգոստոս ամսին: Այդ ընթացքում գործարքի գինը կազմում էր 400-500 միլիոն դոլար, իսկ հավակնորդների թվում նշվում էր «Ուղիղ ներդրումների ռուսական հիմնադրամը»՝ TPG Capital-ը, նաև մի շարք այլ հիմնադրամներ, АФК Система-ն, «Ալֆա Գրուպ»-ը:

Հիշեցնենք, որ «Բորժոմի»-ն, որի ներմուծումը Ռուսաստանի տարածք արգելված է 2006-ից, կարող է հետաքրքիր լինել ռուս գործարարների համար, և, հնարավոր է, շուտով հանքային ջրի ներմուծման արգելքը հանվի: