Բաքուն նյարդային է Վրաստանի վարչապետ Իվանիշվիլիի այցից առաջ

Վաղը Վրաստանի վարչապետ Բիձինա Իվանիշվիլին կայցելի Ադրբեջան. հայտնում է Независимая газета-ն: Իր առաջին տարածաշրջանային այցի շրջանակներում Իվանիշվիլին մտադիր է հանդիպել երկրի ղեկավարության հետ և քննարկել երկկողմ համագործակցությանն ու տարածքային խնդիրներին վերաբերող մի շարք հարցեր:

Այցելության նախօրեին բավական հետաքրքիր իրավիճակ է ստեղծվել. Իվանիշվիլին քննադատական դիտարկումներ էր կատարել Բաքու-Թբիլիսի-Ախալքալաք-Կարս երկաթգծի կառուցման վերաբերյալ, որի շինարարությունն ավարտին կհասցվի 2013-ի գարնանը:

Երկաթգծի նախագծի շուրջ դեռևս նրա կառուցման նախնական փուլում իր կարծիքն էր արտահայտել Վրաստանի ԱԳ նախկին նախարար Սալոմե Զուրաբիշվիլին, ով նշել էր այդ նախագծում վրացական կողմի համար առկա թույլ կողմերը: Նա նախևառաջ առանձնացրել էր, որ երկաթգծի կառուցումը ռիսկի տակ է դնում Փոթի և Բաթումի նավահանգիստների գործունեությունը՝ լուրջ առավելություն տալով թուրքական նավահանգիստներին: Վրաստանը կարող է կորցնել իր տրանզիտային եկամուտները:

Բացի այդ, երկաթգիծը պետք է Ադրբեջանին, իսկ Վրաստանին այն միջին հաշվով ոչինչ չի տալիս՝ բացի մի քանի աշխատատեղից: Ուստի երկաթգծի շինարարությունը պետք է ամբողջովին ֆինանսավորվեր հենց Բաքվի կողմից:

Եվ երրորդ թույլ օղակը Վրաստանի համար այս նախագծում բարոյական բնույթ է կրում: Դա հարևան Հայաստանի հետ հարաբերությունների հետագա ծավալումն է: Հասկանալի է Վրաստանի իշխանությունների ցանկությունը՝ չմերժել հարևան Ադրբեջանին, սակայն Հայաստանը նույնպես հարևան պետություն է: Այս դեպքում անտրամաբանական է մեկ հարևան պետության հետ լավացնել հարաբերությունները, իսկ մյուսի հետ փչացնել դրանք՝ վատթարացնելով առանց այն էլ շրջափակման մեջ գտնվող այդ հարևանի իրավիճակը:

Դա այն դեպքում, երբ Երևանն իր սեփական դիրքորոշումն ունի տարածաշրջանային երկաթգծի հարցում: Գոյություն ունի նաև այդ երկաթգծային ցանցի Գյումրի-Կարս ճյուղը, որը չի գործում հայ-թուրքական փակ սահմանի պատճառով:

Ընդ որում, թուրքական որոշ շրջանակներ Գյումրի-Կարս ճյուղի գործարկումը առավել շահավետ տարբերակ էին համարում, քան ծախսատար Բաքու-Թբիլիսի-Ախալքալաք-Կարս երկաթգծի կառուցումը:

Այժմ իր այցելությունից առաջ այս հարցերին է անդրադարձել նաև հենց Իվանիշվիլին: Բաքուն բավական նյարդային արձագանք է տվել դրան:

Ադրբեջանական ԶԼՄ-ները, հղում կատարելով անհայտ կառավարական աղբյուրներին, նշեցին, որ Ադրբեջանի տրանսպորտի նախարարության մամլո քարտուղար Նամիղ Հասանովը նախազգուշացրել է, թե Ադրբեջանը կարող է վերանայել Թբիլիսիին մատակարարվող գազի չափազանց ցածր արժեքը (հազար խորանարդ մետր գազի դիմաց 200դոլար ) և Վրաստանում շուրջ 3 մլրդ դոլարի հասնող ներդրումների հարցը:

Ճանաչելով Իվանիշվիլիին՝ որպես հաջող ձեռներեցի՝ ակնկալվում է, որ վերջինս փորձում է գործարքի մեջ մտնել Բաքվի հետ՝ իր տրանզիտային եկամուտներն ավելացնելու և, ինչու չէ, նաև գազի սակագինն էժանացնելու նպատակով:

Իվանիշվիլիի ղեկավարած «Վրացական երազանք» կուսակցությունը նախընտրական քարոզարշավի ժամանակ խոստացել էր վերանայել Վրաստանում էներգիայի սակագնի իջեցման հնարավորությունները: Եվ եթե էլեկտրաէներգիայի սակագինը հնարավոր եղավ իջեցնել 27%-ով, ինչի մասին անձամբ Իվանիշվիլին հայտարարել է, ապա գազի գները դեռևս անփոփոխ են մնացել: