ԲԴԽ-ն հերքում է վարչական դատարանի դատավորների բերման ենթարկելու կամ ձերբակալելու մասին լուրերը

ՀՀ վարչական դատարանի որևէ դատավոր բերման չի ենթարկվել և ձերբակալված չէ:  Այս մասին «Ֆեյսբուք»-ի իր էջում գրել է Բարձրագույն դատական խորհրդի մամուլի քարտուղար Ծովինար Խաչատրյանը։

 

 

 

«Տեղեկացնում եմ, որ ՀՀ վարչական դատարանի որևէ դատավոր բերման չի ենթարկվել և ձերբակալված չէ, հետևաբար միմյանց հրապարակումներն արտատպելու և չճշտված տեղեկություններ տարածելու իմաստ չկա», – գրել է Խաչատրյանը։

 

 

 

Առանձնապես խոշոր չափերով կաշառք ստանալու փաստի առթիվ դատական իշխանության ներկայացուցիչների բնակարաններում և աշխատասենյակներում իրականացվել են խուզարկություններ։ Ինչպես «Արմենպրես»-ին հայտնել են Հակակոռուպցիոն կոմիտեից, ձերբակալվել են մի խումբ անձինք, այդ թվում՝ փաստաբան։ «Նախաքննության շահերից ելնելով՝ այս պահին այլ տեղեկատվություն չենք կարող հայտնել», – նշել են ՀԿԿ-ից։

 

 

 

Լրատվամիջոցներում ավելի վաղ հաղորդվել էր, որ քննչական գործողություններ են կատարվել Վարչական դատարանի դատավորներ Անի Չիլինգարյանի, Մհեր Պետրոսյանի և Արգիշտի Ղազարյանի աշխատասենյակներում։