Միքայել Սրբազանի մեղադրական վճիռը կկայացնի նույն դատավորը. բացարկի միջնորդությունը մերժվեց

Շիրակի թեմի առաջնորդ Միքայել արքեպիսկոպոս Աջապահյանի պաշտպանական խմբի ղեկավար Արա Զոհրաբյանը նիստը նախագահող դատավոր Արմինե Մելիքսեթյանին բացարկի միջնորդություն ներկայացրեց։ Զոհրաբյանը պարզաբանեց, որ միջնորդությունը ներկայացնում է վերջին փուլում, քանի որ բացարկի հիմքը հայտնի է դարձել սեպտեմբերի 6-ին, երբ ստացել է դատավորի՝ սեպտեմբերի 2-ի որոշումը։ Դատարանը մերժեց պաշտպանական կողմի միջնորդությունը՝ հիմքերը թույլ համարելով։

Նշենք, որ Աջապահյանի գործը Երևանի ընդհանուր իրավասության առաջին ատյանի դատարանի Ավանի նստավայրում արդեն ավարտական փուլում է։ Այսօր կողմերը ճառերով են հանդես գալու, ապա դատավորը գնալու է վճիռ կայացնելու։

Հիշեցնենք, որ Միքայել արքեպիսկոպոս Աջապահյանին մեղադրանք է առաջադրվել այն բանի համար, որ նա ունենալով արքեպիսկոպոսի հոգևոր աստիճան և հանդիսանալով Հայ Առաքելական Սուրբ Եկեղեցու Շիրակի թեմի առաջնորդը, պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետևորդներ և հետևաբար նաև՝ իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին և արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները, նախ՝ 2024թվականի փետրվարի 3-ին՝ ապա նաև՝ 2025թվականի հունիսի 21-ին, զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր։