Վրաստանի ԱԳՆ-ն պարզաբանում է ԼՂ-ի մասին Փանջիկիձեի հայտարարությունը

Վրաստանի ԱԳՆ-ն պարզաբանություններ է մտցրել Վրաստանի արտգործնախարար Մայա Փանջիկիձեի հայտարարության հարցում, որը նա արել էր Լիտվա կատարած պաշտոնական այցի ժամանակ:

2013թ. հունվարի 10-ին Լիտվա կատարած պաշտոնական այցի շրջանակներում Վրաստանի արտգործնախարար Մայա Փանջիկիձեն Լիտվայի խարհրդարանին կից գործող Եվրոպական ակումբում «Վրաստանի քաղաքականությունը ընտրություններից հետո» թեմայով հանդես է եկել ելույթով:

Ցավոք սրտի, մի շարք ԶԼՄ-ների կողմից այդ ելույթը ոչ ճիշտ մեկնաբանություն գտավ: Առկա է այդ հանդիպման տեսագրությունը, ուր նախարարը հստակ նշում է իր դիրքորոշումը հարևան պետությունների նկատմամբ: Իսկ տեսագրությունը ապացուցում է, որ ոչ մի հիմք չկար նախարարի ելույթը այլ ենթատեքստով մեկնաբանելու համար: Հետաքրքրասեր հանրությունը կարող է ծանոթանալ այդ հանդիպման էությանը, ասված է Վրաստանի ԱԳՆ-ի տարածած հայտարարության մեջ, փոխանցում է Грузия-Online-ը:

Հիշեցնենք, որ ԶԼՄ-ներում լուրերն էին տարածվել այն մասին, թե արտգործնախաարար Փանջիկիձեն Լեռնային Ղարաբաղի հիմնախնդրի կարգավորման միակ տարբերակը տեսնում է Ադրբեջանի տարածքային ամբողջականության պահպանման միջոցով: Դրանից հետո Վրաստանի խորհրդարանական փոքրամասնությունը պահանջել էր Փանջիկիձեի հրաժարականը՝ նշելով, որ նրա չկշռադատված հայտարարության պատճառով լարվելու են պաշտոնական Երևանի հետ Վրաստանի ունեցած հարաբերությունները:

Տեսագրությունից պարզ է դառնում, որ Փանջիկիձեն, խոսելով Հարավային Կովկասի դաշնակիցների մասին, հայտարարում է, որ Վրաստանը բարիդրացիական հարաբերություններ է պահպանում և՛ Ադրբեջանի, և՛ Հայաստանի հետ, սակայն չի պատրաստվում միջամտել նրանց միջև առկա կոնֆլիկտին:

Դրանից հետո Լիտվայում Ադրբեջանի դեսպանը հարցնում է, թե ինչպես են վերաբերվում Վրաստանի նոր իշխանությունները Ադրբեջանի տարածքային ամբողջականության հարցին, քանի որ նրանց հետաքրքրում է՝ չի՞ փոխվել արդյոք որևէ բան հոկտեմբերի 1-ից հետո:

«Մենք պաշտպանում ենք Ադրբեջանի տարածքային ամբողջականությունը. ես չեմ կարծում, որ դա պետք է կրկնել: Սակայն մենք չենք պատրաստվում միջամտել Հայաստանի և Ադրբեջւանի միջև ընթացող բանավեճերին»,- ասել է նախարարը:

Հիշատակված տեսագրության համաձայն՝ նախարարը ոչ մի տեղ չի նշել Լեռնային Ղարաբաղի հակամարտության կարգավորման ճանապարհների և միջոցների մասին:

Տեսագրությունը ներկայացվում է ստորև: