Գեներալ-մայորը ներկայացրել է երկու վարկած՝ Զելենսկու ինքնաթիռը հետապնդած դրոնների վերաբերյալ

Ռազմական ավիացիայի վետերան, Ռուսաստանի վաստակավոր օդաչու և գեներալ-մայոր Վլադիմիր Պոպովը երկու վարկած է առաջադրել Իռլանդիայի երկնքում Ուկրաինայի նախագահ Վլադիմիր Զելենսկու ինքնաթիռը հետապնդած անծանոթ դրոնների վերաբերյալ։ aif.ru-ի հետ զրույցում նա նշել է, որ սարքերը կարող էին նպատակային որսալ Զելենսկուն կամ լինել փորձարկումների պատահական հետևանք։

Միջադեպը տեղի էր ունեցել Զելենսկու այցի ժամանակ, երբ նրա բորտն օդում ուղեկցել էին չորս անճանաչելի թռչող սարքեր։ Դուբլինին մոտենալիս դրոնները հանկարծ փոխել էին ուղղությունը և շարժվել դեպի իռլանդական ռազմական նավ, որը նախօրեին գաղտնի տեղափոխվել էր Իռլանդիայի ծովի տարածք։ Պոպովի գնահատմամբ՝ միջադեպը կարող էր լինել տարբեր հատուկ ծառայությունների կազմակերպված գործողություն՝ Զելենսկուն ցույց տալու, թե «ինչ կարող է իրեն սպասվել որոշ պայմաններում», փոխանցում է Lenta.ru-ն։

Պոպովը չի բացառել նաև այլ տարբերակ․ նրա խոսքով՝ Զելենսկու ինքնաթիռի երթուղին կարող էր պատահաբար համընկնել նոր դրոնների փորձարկումների հետ, իսկ իշխանությունները նախօրոք չէին զգուշացրել, օրինակ՝ ծախսերը խնայելու համար։ Իռլանդիայի ոստիկանությունը արդեն սկսել է միջադեպի քննությունը, որը հանձնվել է ազգային անվտանգության և հակաահաբեկչական գործերով զբաղվող հատուկ դետեկտիվական ստորաբաժանմանը։