ԱՄՆ զինվորականներն ընդունել են, որ «երկակի հարվածով» ոչնչացված նավը շարժվել է դեպի Սուրինամ, ոչ թե ԱՄՆ

CNN-ի փոխանցմամբ՝ ԱՄՆ հատուկ գործողությունների հրամանատար Ֆրենկ Բրեդլին Կոնգրեսին հայտնել է, որ սեպտեմբերի 2-ին հարվածի ենթարկված նավը մտադիր էր հանդիպել մեկ այլ, ավելի մեծ տրանսպորտային նավի, որը շուտով պետք է հասներ Սուրինամ՝ Հարավային Ամերիկայի փոքր պետություն։ Հետախուզական տվյալներով՝ այդ երկու նավերը նախատեսում էին փոխանակել թմրանյութի բեռը, և միայն այդ մեծ նավի հետագա երթուղին կարող էր տեսականորեն ուղղվել դեպի ԱՄՆ։ Սակայն այս վարկածը հակասում է վարչակազմի նախնական պնդումներին, թե նավը անմիջապես ԱՄՆ էր շարժվում։

Պաշտպանության նախարարությունը և նախագահի վարչակազմը փորձել են հիմնավորել՝ ինչու է անհրաժեշտ եղել երկրորդ, երրորդ և չորրորդ հարվածները՝ սպանելով արդեն ջրահեղձված, գոյատևելու համար պայքարող անձանց։ Ամերիկյան զինվորականների լրացուցիչ բացատրությունները, սակայն, ավելի մեծ հարցեր են առաջացրել։ CNN-ի տվյալներով՝ առաջին հարվածով նավը պատռվել է երկու մասի, իսկ երկու վերապրածները, որոնք երևում էին օդից ու ձեռքով նշաններ էին տալիս, սպանվել են հաջորդական երեք հարվածներով։ ԱՄՆ օրենքով՝ նավաբեկյալների սպանությունը կարող է դասվել պատերազմական հանցագործությունների շարքում։

Կոնգրեսը պահանջում է պաշտոնական վերահսկողություն՝ հասկանալու, թե ինչ հրամաններ է տվել նախարար Պիթ Հեգսեթը և ինչու է թույլ տրվել երկրորդ հարվածը, երբ նավի անձնակազմը այլևս սպառնալիք չէր ներկայացնում։ Հատուկ ծառայությունների ղեկավարությունը պնդում է, որ գործողության նպատակն էր ոչնչացնել առաքման բոլոր 11 անդամներին, սակայն պաշտոնապես «հրաման առանց գթության» չի տրվել։ Գործը շարունակում է բորբոքել քաղաքական և իրավական լուրջ քննարկումներ, իսկ Պենտագոնը առայժմ հրաժարվում է մեկնաբանել միջադեպի նոր մանրամասները։