Փորձագետը՝ Իվանիշվիլիի և Սաակաշվիլիի հակասությունների մասին

Աբխազիա-Վրաստան-Հայաստան երկաթուղին հնարավոր է՝ բացվի։ Եվ, առհասարակ, ավելի շատ բան է հնարավոր, քանի որ Հայաստանի և Վրաստանի հարաբերություններում խնդիրներ չկան: Նման հայտարարությամբ երեկ Երևանում հրավիրված մամուլի ասուլիսին հանդես եկավ Վրաստանի վարչապետ Բիձինա Իվանիշվիլին:

Վրաստանի վարչապետը, թեև շեշտեց, որ Հայաստանի հետ հարաբերություններում խնդիրներ չկան, սակայն երկաթգծի բացմանն առնչվող մյուս կողմի՝ Ռուսաստանի հետ հարաբերություններում, խնդիրները դեռևս առկա են:

Ավելի ուշ Վրաստանի նախագահ Միխեիլ Սաակաշվիլին Ռուսաստանի հետ երկաթուղային հաղորդակցության վերականգնման մասին Վրաստանի վարչապետ Բիձինա Իվանիշվիլիի հայտարարությունը որակել է որպես «հակապետական»:

«Իվանիշվիլիի հայտարարությունը, որը նա արել է Հայաստանում, վտանգավոր է և չի բխում Վրաստանի ռազմավարական և աշխարհաքաղաքական շահերից», - հայտարարել էր Սաակաշվիլին:

Այս մասին Լուրեր.com-ը զրուցեց Վրաստանի հարցերով փորձագետ Ալիկ էրոյանցի հետ: Վերջինս նշեց, որ Աբխազիա-Վրաստան-Հայաստան երկաթուղու բացումը ելնում է Հայաստանի շահերից:

Փորձագետը հավանական է համարում Վրաստանի վարչապետի հայտարարությունը, քանի որ Վրաստանի նոր իշխանությունները ցանկանում են իրենց հարաբերությունները բարելավել Ռուսաստանի հետ:

«Ինչ վերաբերում է Սաակաշվիլիի հայտարարությանը, ապա դա այդպես էլ պետք է լիներ: Նա հակառուսական քաղաքականություն էր վարում՝ ոչ մի երկխոսություն Ռուսաստանի հետ: Սաակաշվիլիի քաղաքական թիմը արևմտյան ուղղվածություն ունի և բնական է, որ Իվանիշվիլիի հայտարարությունը նա պիտի համարեր հակապետական, անգամ վրաց-աբխազական երկաթուղու բացման հետ կապված: Քանի կա Հարավային Օսիայի և Աբխազիայի հարցը, այդ առումով նրա արձագանքը, կարելի է ասել, նորմալ էր: Դա Սաակաշվիլիի թիմի դիրքորոշումն է, նրա քաղաքականությունը:

Եթե երկխոսությունը սացվի այնպես, որ Վրաստանի և Ռուսաստանի միջև հարաբերությունները բարելավվեն, ապա Աբխազիա-Վրաստան-Հայաստան երկաթուղու բացումը ավելի իրատեսական կլինի»,- ասաց Էրոյանցը: