Կինը դետեկտիվ է վարձել՝ իր զուգընկերոջ գիշերային բացակայությունների պատճառով և պարզել ցավալի ճշմարտությունը

28-ամյա ավստրալուհի Էմին զուգընկերոջ գիշերային բացակայությունների պատճառով կապ է հաստատել ավստրալական «Ֆիֆի, Ֆև և Նիք» ռադիոշոուի հետ՝ դավաճանությունների մասին «Բռնիր, թե կարող ես» հաղորդմանը հայտնվելու համար։ Երբ կնոջ համար դետեկտիվ են վարձել, նա պարզել է իր զուգընկերոջ մասին ցավալի ճշմարտությունը։

Նախագծի կողմից տրամադրված դետեկտիվ Դեյվը պարզել է, որ տղամարդը հաճախակի մնում էր մի փոքրիկ հյուրանոցում։ Տղամարդու հաշիվն ամրագրման ծառայությունում ստուգելուց հետո նա նկատել է, որ ամեն երկու շաբաթը նույն պրոֆիլում պատվերներ էին հայտնվում՝ տարբեր անուններով։ Այդպիսի մի երեկո Էմիի զուգընկերը զանգահարել է նրան և ասել, որ աշխատանքից ուշ կգա։ Այնուհետև նա հյուրանոց է ժամանել ժամը 20:30-ին, որտեղ դետեկտիվն արդեն թաքնված սպասելիս է եղել։

Դեյվը նկատել է, որ տղամարդը իր մեքենան չէր կայանել հյուրանոցի տարածքում, այլ այն թողել էր դրսում և սենյակ էր մտել հետևի մուտքով՝ տեսախցիկների տեսադաշտում չերևալու համար։ Կես ժամ անց կարմիր մեքենայով մի կին ժամանել և նույնպես մտել է հյուրանոց։ Այնուհետև ուտելիք է առաքվել դռան մոտ, և ժամը 1:30-ին զույգը միասին լքել է շենքը։ Այդ ժամանակ էլ դետեկտիվը լուսանկարել է նրանց միասին։ «Նա գրկում էր անհայտ կնոջը, և դա պարզապես արագ «բարև» և «ցտեսություն» չէր։ Դրանում իսկական մտերմություն կար», - պատմել է նա։

Էմիի խոսքով՝ խորհրդավոր կինը պարզվել է՝ իր դպրոցական լավագույն ընկերուհին է։ «Վստահ եմ, որ ժամանակի ընթացքում ես շնորհակալ կլինեմ, որ այս ամենը հիմա բացահայտվեց, այլ ոչ թե ավելի ուշ։ Առայժմ սիրտս ցավում է», - ասել է նա հաղորդավարներին։ Նա նշել է , որ որոշել է առայժմ չպատմել իր զուգընկերոջը դրա մասին։ Հաղորդվում է, որ ռադիոկայանը նրա համար հանդիպում է կազմակերպել հոգեբանի հետ։