Ավելի քան 100 հոգեւորական իր անվերապահ հավատարմությունն է հայտնել Գարեգին Երկրորդին

Արդեն ավելի քան 100 հոգեւորական է իր անվերապահ աջակցությունը հայտնել Մայր Աթոռին եւ Ամենայն հայոց կաթողիկոս Գարեգին Երկրորդին։

Տարբեր թեմերի քահանաներ գրառումներ են կատարում՝ իրենց անվերապահ հավատարմությունը հայտնելով Հայրապետին։ Նրանցից մի քանիսի գրառումները ներկայացնում ենք ստորեւ.

«Աստվածաշունչը չարին բնորոշում է որպես խաբեբա, զրպարտող և պառակտիչ: Այսօր այն ամենը, ինչ տեղի է ունենում Հայոց Եկեղեցու շուրջ իշխանությունների կողմից իբրև «եկեղեցական բարեկարգություն» արշավով, կրում է հենց այս նույն «ձեռագիրը»:

Կարևոր է հիշել մի պարզ ճշմարտություն. հնարավոր չէ իրականացնել «բարենորոգում» չարի ոճով ու գործելակերպով:

• Երբ օգտագործվում է զրպարտությունը՝ սիրո փոխարեն,
• Երբ սերմանվում է պառակտում՝ միաբանության փոխարեն,
• Երբ գործում է հարկադրանքը՝ ազատության փոխարեն,

սա ոչ թե բարեփոխում է, այլ նույն չարի հերթական դրսևորումը: Չարը չի կարող բարիք ստեղծել, նրա նպատակը միշտ կործանումն է ու հոգևոր արժեքների նսեմացումը: Մնա՛նք արթուն և զգոն՝ տարբերելու լույսը խավարից».Հայր Վաչե Մկրտչյան

«Բոլոր բարիքների պարգևող Աստված, վերադարձրու մեր ժողովրդի երբեմնի խաղաղությունը և վերականգնիր հոգևոր սպասավորներիս եղբայրասիրությունն ու միաբանությունը». Տեր Կարապետ քահանա Ստեփանյան

«Հոգեւորականի համար հավատարմությունը բարձրագույն արժեք է։ Դա ոչ միայն լոկ խոստում է Աստծուն, այլև ուղեցույց՝ յուրաքանչյուր օրը սկսելու եւ ավարտելու համար։ Հավատարիմ լինել նշանակում է ծառայել անկեղծ, պահպանել ճշմարտությունը և լինել օրինակ մարդկանց համար։ Սրան հակառակ՝ անհավատարմությունը խաթարում է ներքին խաղաղությունը և վստահությունը։ Հավատարմությունը չի գովազդվում, այն երևում է գործերում, աղոթքներում և խոսքի մաքրության մեջ։

Հավատարիմ հոգեւորականը կանգնած է դժվարությունների ու հուսահատության առաջ, բայց չի հրաժարվում իր կոչումից։ Հավատարմության լույսը, որ ճառագում է իրենից, սփռվում է համայնքի վրա՝ մարդկանց ցույց տալով հավատքի ուղին։ Հավատարիմ հոգեւորականի կյանքը սովորեցնում է սիրել, համբերել և ծառայել առանց պայմանների։ Հավատարմությունը պահում է հոգին և կերտում մարդուն իր հոգևորի ձգտումների ճանապարհին։ Այդպիսին է հոգեւորականի հավատարիմ ուղին՝ պարզ, ամուր և անփոփոխ։

Մնում եմ հավատարիմ Իջման Սուրբ Սեղանի առջեւ ստանձնած իմ ուխտին՝ որդիական ջերմ սիրով եւ խոնարհությամբ։ Աստված օգնական, Վեհափառ Տեր». Վիրապ աբեղա Սարգսյան

«Ցավալի է, որ որոշ հոգևորականներ տրվելով գայթակղության՝ իրենց դուրս դրեցին մեր եղբայրությունից և դարձան գործիք պառակտման ամոթալի գործընթացի։

Ապաշխարեցե'ք և ետ դարձե'ք ձեր խոտոր ճանապարհից, վաղը ուշ է լինելու։

Եկեղեցին անպարտելի է». Տեր Մաղաքիա քահանա Օհանյան

«Սա հերթական փորձն է մեզ կտրելու մեր արմատներից, պատմությունից և ինքնությունից։ Ինչպես մեզ զրկեցին Արցախից, հաղթանակների բերկրանքից, այդպես էլ ուզում են զրկել քրիստոնեա լինելու բերկրանքից։

Տիրադա՞վ, թե՞ ազգադավ․․․». Տեր Գաբրիել քահանա Վարդանյան

Հոգեւորականների գրառումներին կարող եք ծանոթանալ «Հայ եկեղեցու նորություններ» ֆեյսբուքյան էջում։