Ֆրանսիացի ֆուտբոլիստը զոհվել է Թայլանդում՝ սելֆի անելու փորձի ժամանակ

Ֆրանսիացի 22-ամյա ֆուտբոլիստ Ալեքսիս Վերգոսը ողբերգական մահ է գտել Թայլանդում՝ ջրվեժի մոտ սելֆի անելու ընթացքում։ Ինչպես հաղորդում է RTL-ը, մարզիկը բարձրությունից ընկել է և մահացել տեղում ստացած վնասվածքներից։

Միջադեպը տեղի է ունեցել հունվարի 5-ին՝ Թայլանդի Սամույ կղզիում, որտեղ Վերգոսը հանգստանում էր իր նշանածի հետ։ Սայթաքելով սայթաքուն քարերի վրա՝ նա ընկել է ջրի մեջ և գլխով հարվածել քարերին։ Փորձաքննության տվյալներով՝ ստացած վնասվածքները մահացու են եղել։ Փրկարարները, չնայած ուժեղ հոսանքին, կարողացել են դուրս բերել նրա մարմինը։ Ֆուտբոլիստի նշանածը փրկվել է՝ կարողանալով բռնվել ծառի ճյուղից։

Վերգոսի մահը հաստատել է ֆրանսիական Քեմպեր Էրգե Արմել ակումբը, որի սաներից էր նա։ Ակումբը ցավակցություն է հայտնել ֆուտբոլիստի հորը և մարզիչին՝ Թիերի Վերգոսին, ինչպես նաև նրա ընտանիքի մյուս անդամներին։ Նշվում է, որ երկու մրցաշրջան առաջ Վերգոսը հանդես էր գալիս ակումբի հիմնական կազմում։