Փոխվել են որոշ ցմահ դատապարտյալների անվտանգային գոտիները և պայմանները

Քրեակատարողական ծառայության կենտրոնական մարմնում գործող տեղաբաշխման հանձնաժողովը՝ հանձնաժողովի նախագահ, Ծառայության պետի առաջին տեղակալ Սահակ Գրիգորյանի գլխավոությամբ, արտագնա նիստ է անցկացրել «Սևան» քրեակատարողական հիմնարկում։

Նիստի ընթացքում հանձնաժողովը քննարկել է ցմահ ազատազրկման դատապարտված որոշ անձանց գործերը նրանց անվտանգային գոտիների փոփոխության նպատակով։

Հանձնաժողովի անդամներն անձամբ հանդիպել են դատապարտյալների հետ, ծանոթացել վերջիններիս կողմից ներկայացվող հիմնավորումներին, տեղում ուսումնասիրել նրանց՝ վերասոցիալականացման, կրթական գործընթացներում ներգրավվածությունն ու աշխատանքային զբաղվածությունը։ Անմիջական շփման ընթացքում գնահատվել են նաև դատապարտյալների անձնական հատկանիշները և հնարավոր ռիսկերը։

Նիստի արդյունքում կայացված որոշումների համաձայն՝ որոշ ցմահ դատապարտյալներ իրենց պատժի հետագա կրումը կշարունակեն առավել ցածր անվտանգային գոտիներում և պայմաններում։