ԱՄՆ տնտեսությունը կտրուկ դանդաղել է․ աճը ընկել է մինչև 0.5%

ԱՄՆ տնտեսությունը 2025 թվականի չորրորդ եռամսյակում աճել է ընդամենը 0.5 տոկոսով։ Այս մասին հայտնում է Reuters-ը՝ հղում անելով ԱՄՆ առևտրի նախարարության տնտեսական վերլուծության բյուրոյի տվյալներին։

Նշվում է, որ ցուցանիշը զգալիորեն ցածր է ինչպես նախնական կանխատեսումից (0.7 տոկոս), այնպես էլ նախորդ եռամսյակի արդյունքից, երբ ՀՆԱ-ի աճը կազմել էր 4.4 տոկոս։ Վերլուծաբանների գնահատմամբ՝ նման կտրուկ դանդաղման հիմնական պատճառը դարձել է ԱՄՆ կառավարության աշխատանքի ժամանակավոր դադարեցումը, որն ազդել է տնտեսական ակտիվության վրա։

Միևնույն ժամանակ հաղորդվում է, որ 2025 թվականին ընդհանուր տնտեսական աճը կազմել է 2.2 տոկոս՝ դառնալով նվազագույնը 2020 թվականի համավարակային շրջանից ի վեր։ Նախորդ տարիներին աճը զգալիորեն ավելի բարձր էր՝ 2021-ին՝ 6.2%, 2022-ին՝ 2.5%, 2023-ին՝ 2.9%, իսկ 2024-ին՝ 2.8%։