Կրեմլը չի մեկնաբանում Թրամփի աղմկահարույց լուսանկարը՝ «Հիսուսի կերպարով»

Կրեմլը հրաժարվել է մեկնաբանել ԱՄՆ նախագահ Դոնալդ Թրամփի կողմից հրապարակված աղմկահարույց պատկերն, որտեղ նա ներկայացված է Հիսուս Քրիստոսին հիշեցնող կերպարում։ ՌԻԱ Նովոստիի փոխանցմամբ՝ Ռուսաստանի նախագահի մամուլի քարտուղար Դմիտրի Պեսկովը հայտարարել է, որ չի ցանկանում անդրադառնալ այդ հրապարակմանը։

«Չեմ ցանկանա մեկնաբանել սա, ուստի կթողնեմ առանց մեկնաբանության»,- նշել է Պեսկովը՝ պատասխանելով լրագրողների հարցին։ Խոսքը վերաբերում է պատկերին, որը տարածվել էր Թրամփի Truth Social հարթակում։

Ավելի վաղ Թրամփը հրապարակել էր նկար, որտեղ ներկայացված էր սպիտակ հանդերձանքով՝ հիվանդի վրա ձեռք դնելով, իսկ նրա ափերից լույս էր արձակվում։ Կադրում առկա էին նաև ամերիկյան խորհրդանիշներ՝ դրոշ, արծիվ, Ազատության արձան և ռազմական ինքնաթիռներ։ Ավելի ուշ քաղաքական գործիչը հեռացրել էր հրապարակումը՝ հայտարարելով, որ միայն «կեղծ լրատվամիջոցները» կարող էին նման ենթադրություն անել։