ԱՄՆ-ում արձագանքել են Եվրոպայի հասցեին հնչած ռուսական սպառնալիքներին

Ամերիկացի ռազմական վերլուծաբան և նախկին հետախույզ Սքոթ Ռիտերը հայտարարել է, որ ԱՄՆ-ը չի աջակցի եվրոպական երկրներին, եթե Ռուսաստանը հարվածներ հասցնի Ուկրաինայի համար դրոններ արտադրող օբյեկտներին Եվրոպայում։ Նրա խոսքերը փոխանցում է РИА Новости-ը։

Ռիտերի խոսքով՝ եվրոպական երկրներն ինքնուրույն են ներգրավվում ռիսկային իրավիճակներում, և հնարավոր հարվածների դեպքում Վաշինգտոնը դժվար թե միջամտի։ Նա նաև ենթադրել է, որ նման սցենարի դեպքում ԱՄՆ ղեկավարությունը կարող է պատասխանատվությունը վերագրել հենց եվրոպական կողմին։

Ավելի վաղ Ռուսաստանի պաշտպանության նախարարությունը հրապարակել էր Եվրոպայում գործող այն ձեռնարկությունների հասցեները, որոնք, ըստ ռուսական կողմի, արտադրում են անօդաչու սարքեր Ուկրաինայի համար։ Ռուսական պաշտոնյաները նշել էին, որ այդ օբյեկտները կարող են դիտարկվել որպես պոտենցիալ թիրախներ, ինչի ֆոնին փորձագետները քննարկում են ՆԱՏՕ-ի միասնականության և արձագանքի հնարավորությունները։