Հակակոռուպցիոն կոմիտեի հնգամյա գործունեության ընթացքում առաջին գիտագործնական ձեռնարկն է լույս տեսել

Ապրիլի 20-ին տեղի է ունեցել Հակակոռուպցիոն կոմիտեի կազմավորման հոբելյանական՝ 5-րդ տարեդարձին նվիրված՝ «Կոռուպցիոն հանցագործությունների քննության մեթոդիկա» գիտագործնական ձեռնարկի շնորհանդեսը: Կոմիտեի հնգամյա գործունեության ընթացքում հրատարակված առաջին ուսումնամեթոդական գիտագործնական ձեռնարկի համահեղինակներն են ՀՀ վաստակավոր իրավաբան, իրավաբանական գիտությունների դոկտոր, պրոֆեսոր Վահե Ենգիբարյանը, Հակակոռուպցիոն կոմիտեի նախագահ Արթուր Նահապետյանը և նախագահի տեղակալ Արմեն Ասատրյանը։ 

Ընդգծելով ձեռնարկի պրակտիկ կիրառման կարևորությունը քննիչների առօրյա աշխատանքում՝ բանախոսները նշել են, որ այս աշխատության միջոցով մասնագիտական հանրությանն առաջարկվում են տարբեր տիպային քննչական իրավիճակների համար խնդիրների լուծման արդեն իսկ փորձված մեթոդներ ու տեխնոլոգիաներ, որոնք կարող են նպաստել կոռուպցիոն հանցագործությունների քննության արդյունավետության բարձրացմանը: Անդրադարձ է եղել ձեռնարկում տեղ գտած տեսական և գործնական ուսումնասիրություններին, առաջարկվող գործիքակազմին, որը կարող է առօրյա աշխատանքում որպես «սեղանի գիրք» ծառայել հակակոռուպցիոն ոլորտում մասնագիտացված քննիչների, օպերատիվ աշխատակիցների, ոլորտում մասնագիտացած իրավաբանների, իրավապահ համակարգի աշխատակիցների և ուսանողների համար:

Գրքի համահեղինակ, Հակակոռուպցիոն կոմիտեի նախագահ Արթուր Նահապետյանն իր ելույթում մատնանշել է, որ մեթոդական ուղեցույցը ոչ միայն տեսական աշխատություն է, այլև ներառում է Հակակոռուպցիոն կոմիտեի գործունեության նախորդ հինգ տարիների կուտակված փորձն ու գիտելիքները: Արթուր Նահապետյանը համոզմունք է հայտնել, որ քննիչի սեղանին դեռևս հայտնվելու են նմանատիպ բազմաթիվ աշխատություններ, որոնք կօգնեն թե՛ նրանց՝ պրակտիկ աշխատանքում, և թե՛ իրավական ոլորտում աշխատանքը շարունակել ցանկացող ապագա սերնդին. «Սա ոչ միայն մեր՝ համահեղինակների  աշխատությունն է, այլև բոլորինս է՝ Հակակոռուպցիոն կոմիտեինը, ինչն իրապես ուրախանալու և հպարտանալու առիթ է»,- ասել է Կոմիտեի նախագահը:

Ձեռնարկի մյուս համահեղինակը՝ Երևանի պետական համալսարանի քրեական դատավարության և կրիմինալիստիկայի ամբիոնի պրոֆեսոր Վահե Ենգիբարյանը, բացի տեսական-գործնական խնդիրների միասնություն ներկայացնող ընդհանուր աշխատանքի կարևորությունից, շեշտել է ձեռնարկի մեջ թերևս առաջին անգամ հայրենական կրմինալիստիկայի նոր բառամթերք օգտագործելու հանգամանքը: Խոսքը տակտիկատեխնոլոգիական հնարքների և գաղտնի քննչական գործողությունների տեխնոլոգիայի մասին է, որը, ըստ Վ. Ենգիբարյանի, մինչ օրս, համենայն դեպս, մասնագիտական գրականության մեջ ուսումնասիրված չի եղել:

Հակակոռուպցիոն կոմիտեի նախագահի տեղակալ Արմեն Ասատրյանն իր հերթին, որպես համահեղինակ, շեշտել է ձեռնարկի կարևորությունը քննչական աշխատանքի արդյունավետ պլանավորման ու կազմակերպման, ռիսկերը ճիշտ գնահատելու հարցում: Ըստ նրա՝ ձեռնարկն ընդհանուր առմամբ կզարգացնի հակակոռուպցիոն պայքարի կարողությունները և կնպաստի համակարգի արդյունավետության բարձրացմանը:

Շնորհանդեսի ավարտին գիտագործնական ձեռնարկի մշակման գործում նշանակալի մասնակցություն ունենալու համար Վահե Ենգիբարյանը Հակակոռուպցիոն կոմիտեի նախագահի հրամանով պարգևատրվել է «Համագործակցության համար» մեդալով:

«Կոռուպցիոն հանցագործությունների քննության մեթոդիկա» ձեռնարկից համահեղինակները օրինակներ են նվիրելու նաև Հայաստանի ազգային գրադարանին, Երևանի պետական համալսարանի, այլ բարձրագույն ուսումնական հաստատությունների և գործընկեր կառույցների գրադարաններին: