Թրամփը կարող է անձամբ հայտնվել ԱՄՆ–Իրան համաձայնագրի ստորագրմանը

ԱՄՆ նախագահ Դոնալդ Թրամփ-ը կարող է անձամբ մասնակցել Իրանի հետ խաղաղության համաձայնագրի ստորագրմանը, եթե բանակցությունները հասնեն վերջնական փուլին։ Այս մասին հայտնում է Reuters գործակալությունը՝ հղում անելով պակիստանյան աղբյուրներին։

Տեղեկությունների համաձայն՝ Թրամփը կարող է ներկա գտնվել հանդիպմանը թե՛ ֆիզիկապես, թե՛ տեսակապի միջոցով՝ պայմանավորված վերջնական համաձայնության կայացմամբ։ Միևնույն ժամանակ իրանական աղբյուրները նշում են, որ Թեհրանը դրական է վերաբերվում հնարավոր գործարքին, սակայն ակնկալում է, որ կբավարարվեն իր հիմնական պահանջները, այդ թվում՝ ուրանի հարստացման իրավունքի ճանաչումը։

Ավելի վաղ հաղորդվել էր, որ Իրանը համաձայնել է բանակցությունների երկրորդ փուլին, իսկ ԱՄՆ-ի կողմից գործընթացին կմասնակցի փոխնախագահ Ջեյ Դի Վենս-ը։ Սպասվում է, որ առաջիկա քննարկումները կարող են վճռորոշ լինել Վաշինգտոնի և Թեհրանի միջև հարաբերությունների ապագայի համար։