Մոսկվան վրացական դրոշներ է գնում՝ պատրաստվելով Իվանիշվիլիի այցին. Известия

Ինչպես գրում է Известия պարբերականը, Մոսկվան սպասում է վարչապետ Իվանիշվիլիի ղեկավարած պատվիրակության ժամանմանը: Այցի ժամկետներն ու այլ մանրամասներ չեն քննարկվում: Այդ մասին Известия-ին հայտնել են ռուսական կառավարական աղբյուրները:

Ինչպես հայտնում են այդ աղբյուրները, ռուսական կառավարությունն արդեն գնել է վրացական դրոշներ, որոնք կտեղադրվեն կառավարության տանը պաշտոնական Վրաստանի պատվիրակության ընդունելության ժամանակ:

Պարբերականը գրում է, որ հայտնի չէ, թե այդ հանդիպմանը ով է ներկայացնելու ռուսական կողմը՝ վարչապետը, թե՝ փոխվարչապետը:

Սակայն պաշտոնական Մոսկվան չի հաստատել այդ տեղեկությունը: «Օրակարգում նման հարց դրված չէ»,-հայտարարել է Վլադիմիր Պուտինի մամլո քարտուղար Դմիտրի Պեսկովը:

Այցելության մասին լուրերը չի հաստատել նաև պաշտոնական Թբիլիսին: Ռուսաստանի հարցերով Վրաստանի վարչապետի ներկայացուցիչ Զուրաբ Աբաշիձեն, սակայն, նշել է. «Տեսականորեն նման այցը բացառված չէ, ուստի Մոսկվային չէր խանգարի վրացական դրոշ ունենալը»: