Նաիրա Զոհրաբյանը հանդիպեց Շոն Մակնելիի հետ

Մայիսի 21-ին ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը հանդիպեց ԱՄՆ միջազգային զարգացման գործակալության՝ Հայաստանի Ազգային ժողովին աջակցման ծրագրի տնօրեն Շոն Մակնելիի հետ:

Խոսելով նախորդ տարիներին ԱՄՆ Միջազգային զարգացման գրասենյակի կողմից խորհրդարանում իրականացված ծրագրերի մասին՝ Նաիրա Զոհրաբյանը նշեց, որ որպես եվրոպական ինտեգրման հարցերի մշտական հանձնաժողովի նախագահ, ինքը արդյունավետ չի գնահատում գործակալության կողմից մինչ այժմ ԱԺ-ում իրականացված ծրագրերը: Ըստ հանձնաժողովի նախագահի՝ կարիքների այն գնահատումն ու այն ծրագրերը, որը այս տարիների ընթացքում իրականացրել է ԱՄՆ միջազգային զարգացման գործակալությունը ՀՀ ԱԺ-ում, չեն արտահայտում խորհրդարանի իրական կարիքները։ Տիկին Զոհրաբյանն առաջարկեց փոխել կարիքների գնահատման թիրախներն ու ուղղությունները, ասելով, որ ինքը պատրաստ է ներկայացնել առաջարկությունների իր փաթեթը։ Կողմերը քննարկեցին խորհրդարանի տարբեր քաղաքական խմբակցությունների կանանց մասնակցությամբ աշխատանքային խումբ ստեղծելու գաղափարը, որի օրակարգում կլինեն գիտական, կրթական, մշակութային, առողջապահական, բնապահպանական հարցեր։ Շոն Մակնելիին, կարեւորելով Նաիրա Զոհրաբյանի առաջարկը, նշեց, որ հունիսի 4-ին իրենց նախաձեռնությամբ տեղի կունենա խորհրդարանի կին պատգամավորների հետ հանդիպում՝ քննարկելու գործակալության առաջիկա ծրագրերում կանանց ներգրավածությանը վերաբերող հարցեր:

Ծրագրի տնօրենը եվրոպական ինտեգրման հարցերի մշտական հանձնաժողովի նախագահից ակնկալեց ակտիվ մասնակցություն եւ նոր ծրագրերին վերաբերող առաջարկների ներկայացում, որոնք կհովանավորի ԱՄՆ միջազգային զարգացման գործակալությունը:

Հանդիպման ընթացքում կողմերը քննարկեցին նաեւ խորհրդարանում օրենսդրության նախապատրաստման գործընթացին վերաբերող հարցեր: