Պատերազմի վտանգ չեմ տեսնում. քաղաքագետ

«Ես պատերազմի վտանգ չեմ տեսնում: Ադրբեջանական կողմի այսպիսի ագրեսիվ դրսևորումները կապված են, ինչպես իրենք են անվանում, «Սև հունվարի» հետ, երբ խորհրդային բանակը բավական ուշացած միջամտեց ադրբեջանցիների կողմից հայերի նկատմամբ կատարվող հանցագործություններին»: Այս մասին այսօր` լրագրողների հետ հանդիպման ժամանակ, հայտարարեց «Ոստանապատ» վերլուծական կենտրոնի տնօրեն, քաղաքագետ Լևոն Մելիք-Շահնազարյանը:

Քաղաքագետը նշեց, որ բացի հունվարից այսպիսի մի քանի օրեր ևս կան՝ մայիսի 9-ը, սեպտեմբերի 2-ը, երբ նրանք իրենց դժբախտությունները կապում են հայերի հետ և փորձում, ըստ իրենց` վրեժխնդիր լինել: Ըստ Մելիք-Շահնազարյանի` այս տարի որոշակի ագրեսիվացում նկատվում է, ինչը քաղաքագետի կարծիքով` կապված է Ադրբեջանի պաշտպանության նախարարի փոփոխության հետ, ով զինվորական չէ, այլ պրոֆեսիոնալ ոստիկան: «Նա այսպիսի քայլերով միգուցե փորձում է ուշադրություն գրավել կամ իր դիրքերն ամրապնդել: Վերջերս նա մի ասուլիսում նույնիսկ պահանջել էր լրագրողներից չհայտարարել իրենց զոհերի մասին՝ պետական գաղտնիքները չբացահայտել: Սա զուտ ոստիկանական մոտեցում է, ֆանտազիան էլ է վերջացել: Ամեն դեպքում սրանով նրանք իրենց ներքին հարցերն են լուծում»,-ասաց Լ. Մելիք Շահնազարյանը:

Խոսելով հայկական բանակի մասին` քաղաքագետն ասաց. «Մեր բանակի մարտական ոգին, և պրոֆեսիոնալիզմը շատ բարձր է, և մեր բանակը ո’չ զենքով, ո’չ պատրաստվածությամբ չի զիջում ադրբեջանականին»:

Լևոն Մելիք-Շահնազարյանը վստահություն հայտնեց, որ եթե ադրբեջանական կողմը վստահ լինի, որ մենք պատրաստ չենք դիմագրավման, նրանք դա անմիջապես կանեն. «Ադրբեջանական կողմից դիվերսիոն խմբեր են հարձակվում մի քանի ուղղությամբ, իսկ մեր կողմում դիմագրավել են 18-20 տարեկան տղաներ: Արդյունքում` նրանք ավելի շատ զոհեր ունեցան»: