Գիշերվա ընթացքում հակառակորդը հայկական դիրքերի ուղղությամբ 60 կրակոց է արձակել

Սահմանի ողջ երկայնքով փետրվարի 10-ի լույս 11-ի գիշերվա ընթացքում Ադրբեջանը խախտել է հրադադարն ու հայկական կողմի ուղղությամբ կրակահերթեր բացել: Հակառակորդը կրակել է Արցախի դիրքապահների, իսկ ՀՀ Տավուշի մարզում կրակ բացել նաև բնակավայրերի ուղղությամբ: «Արմենպրես»-ի հետ զրույցում ՀՀ պաշտպանության նախարարի մամուլի խոսնակ Արծրուն Հովհաննիսյանն ասաց, որ հայկական դիրքերի ուղղությամբ արձակվել է 60 կրակոց, դրանց մեծ մասը` անկանոն: «Հայկական զինված ուժերը պատասխան կրակ չեն բացել»,-ասաց Հովհաննիսյանը' հավելելով, որ հայկական կողմը զոհեր կամ վիրավորներ չունի, իսկ առավոտյան սահմանին վիճակը կայունացել է:

Թեպետ Միջազգային օլիմպիական կոմիտեն կոչ էր արել Սոչիի ձմեռային օլիմպիադայի ժամանակ հակամարտող երկրներին զերծ մնալ բռնությունից և պահպանել օլիմպիական զինադադարը, սակայն ադրբեջանական կողմը բազմիցս խախտել է այն' հայկական դիրքապահների ուղղությամբ կրակահերթեր բացելով և սահմանին իրավիճակը լարելով: Դրան ի պատասխան, հայկական կողմը պատրաստակամություն է ցուցաբերել, որպեսզի օլիմպիական խաղերի ժամանակ սահմանին իրավիճակը չսրվի և զոհեր չգրանցվեն:

Սահմանային անվտանգության հարցը քննարկվել է նաև փետրվարի 5-ին ԵԱՀԿ Մինսկի խմբի համանախագահների հետ Սեյրան Օհանյանի հետ հանդիպման ժամանակ և Պաշտպանության նախարարը վերահաստատել է հայկական կողմի դիրքորոշումը' հրադադարի ռեժիմը չպետք է խախտվի և պետք է բացառվի սահմանին լարված վիճակի ստեղծումը: Հայ դիրքապահները պատասխան գործողությունների են անցնում միայն, եթե ադրբեջանական կողմը դիմում է սադրիչ գործողությունների: