Մամուլի ազատության ինդեքսով Հայաստանը տարածաշրջանում առաջատարն է, իսկ ԱՊՀ-ում` երկրորդը

«Լրագրողներ առանց սահմանների» իրավապաշտպան կազմակերպության հրապարակած մամուլի ազատության ամենամյա ցուցիչի համաձայն՝ Հայաստանը տարածաշրջանում առաջատարն է, իսկ ԱՊՀ-ում զբաղեցնում է երկրորդ հորիզոնականը։ Ըստ ցուցիչի` ուսումնասիրության մեջ» ներառված 180 երկրների շարքում Հայաստանը զբաղեցնում է 74-րդ հորիզոնականը, Վրաստանը 100-րդ, իսկ Ադրբեջանը` 156-րդ տեղը։ Ըստ ցուցիչի` ԱՊՀ-ում մամուլի ազատության ցուցիչով առաջատարն է Մոլդովան` 55-րդ հորիզոնականը, Թուրքմենստանը` հետնապահն է`177 միավորով։

2014 թ. Մամուլի ազատության համաշխարհային ցուցիչի համաձայն` ԱՊՀ գոտին գլխավորող երկրների քառյակում նախորդ տարվա համեմատությամբ փոփոխությունները զգալի չեն։ Մոլդովան, Վրաստանը, Հայաստանն ու Ղրղզստանը բնութագրվում են զգալի բազմակարծությամբ և հարաբերականորեն թույլ պետական գրաքննությամբ երկրներ։ «Սակայն հասարակության ուժեղ բևեռացումն արտացոլվում է մեդիա դաշտի և լրագրողների աշխատանքային մթնոլորտի վրա, ովքեր հաճախ տուժում են տարբեր տեսակի ճնշումներից։ Այն պայմաններում, երբ ԶԼՄ-ների քաղաքական կողմնորոշումը էականորեն առնչություն ունի իրենց սեփականատերերի անձի հետ, մեծ մարտահրավեր է մնում խմբագրությունների անկախության ապահովումը»,-նշվում է զեկույցում։

Փաստաթղթում նշվում է, որ Վրաստանում և Հայաստանում 2013 թ.–ի ընտրություններն անցել են ավելի հանգիստ մթնոլորտում, քան նախորդները։ «Լրագրողների նկատմամբ բռնության դեպքերն ավելի հազվադեպ են գրանցվել։ Պետական աուդիովիզուալ արշավը մեծ հաջողությունների է հասել անաչառության տեսակետից, սակայն ընտրական ժամանակահատվածը սրացրել է տեղեկատվական պատերազմը մասնավոր ԶԼՄ–ների շրջանում, պատերազմ, որտեղ իշխանությունները զգալիորեն գերակշռում են»,- ասված է զեկույցում։

Տարածաշրջանում Հայաստանի մնացած հարևաններն էլ մամուլի ազատության բարձր մակարդակով չեն փայլում. Թուրքիան զբաղեցնում է 154-րդ, իսկ Իրանը` 174-րդ հորիզոնականը։ Վարկանիշային աղյուսակն անփոփոխ գլխավորում են եվրոպական երկրները` Ֆինլանդիան, Նիդերլանդները, Նորվեգիան, Լյուքսեմբուրգը և Անդորրան, եզրափակում Չինաստանը, Սոմալին, Սիրիան, Թուրքմենստանը, ԿԺԴՀ-ն, Էրիթրեան։

«Լրագրողներ առանց սահմանների» կազմակերպությունը հիմնադրել են Ռեբի Մենարդը, Ռեմի Լոուրին, Ժակ Մոլենաթն ու Էմիլիեն Ժուբինաուն 1985-ին Ֆրանսիայում: Ժամանակի ընթացքում կազմակերպությունն ընդլայնեց աշխարհագրական տարածքն ու իր համար մշակեց երկու կարևորագույն օրակարգ` ապահովել նյութական, ֆինանսական եւ հոգեբանական աջակցություն լրագրողներին հանձնարարված վտանգավոր ոլորտներում, նաև հետևել ինտներտային լրատվամիջոցներում գրաքննության կիրառմանը: