Հայաստանը, Վրաստանը, Թուրքիան և Բուլղարիան կստեղծեն զբոսաշրջային միասնական ցանց

«Նորարարարական գյուղական զբոսաշրջության խթանում» ծրագրով Հայաստանը, Վրաստանը, Թուրքիան և Բուլղարիան կստեղծեն մեկ միասնական զբոսաշրջային ցանց: Ծրագիրն իրականացնում է «Հեյֆեր Հայաստան» կազմակերպությունը' Եվրոպական միության աջակցությամբ: «Նորարարարական գյուղական զբոսաշրջության խթանում» ծրագրի համակարգող Աննա Առաքելյանի խոսքով' ծրագիրը տևելու է 18 ամիս, որի ընթացքում աշխատանքներ են տարվելու չորս երկրների զբոսաշրջության ոլորտում տեղական ծառայություններ մատուցող ընկերությունների, տուրիստական գործակալությունների և պետական կառավարման մարմինների, միջազգային կազմակերպությունների հետ: «Բոլոր մակարդակներում նախատեսվում է համագործակցություն և ինտեգրացիա, տարբեր տեսակի հանդիպում-քննարկումներ: Տեղական ծառայություն մատուցողների կարողությունների և հմտությունների զարգացման դասընթացներ կացկացվեն: Կլինեն փորձի փոխանակմանը խթանող այցեր տուրիստական գործակալությունների ներկայացուցիչների մակարդակով»,-ասաց Աննա Առաքելյանը:

Նրա ներկայացմամբ' ծրագրի շրջանակներում կստեղծվեն ուսուցում ստացած և հմտություններ ունեցող գյուղական զբոսաշրջության ոլորտում տեղական ծառայություններ մատուցողների և տուրիստական գործակալությունների ցանցեր, որոնք մշակեն և կվաճառեն «տարածաշրջանային այցելուի միասանական փաթեթը»: «Ծրագրի շրջանակներում այս արտադրանքի ստեղծման նպատակն է տարածաշրջանային մակարդակով գյուղական զբոսաշրջության ոլորտում երկարատև արդյունքների ձեռքբերումը»,-ասաց Աննա Առաքելյանը' հավելելով, որ ծրագրի իրականացման ընթացքում նկարահանվելու են երկրների զբոսաշրջային առաջարկությունների մասին երկու տեսահոլովակ, որոնք տարածվելու են միջազգային լրատվամիջոցներով:

ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը, ով ներկա էր քննարկմանը, կարևորեց նմանատիպ ծրագրերի անցկացումը զբոսաշրջության ոլորտում: «Շատ կարևոր է, որ ոլորտում գործող բոլոր հետաքրքրված կողմերը կիսվեն իրենց կարծիքով և միասնականորեն կարողանանք, նմանատիպ առիթները ճիշտ օգտագործելով, մեր ունեցածը յուրովի ներկայացնել»,-ասաց Մեխակ Ապրեսյանը:

Նրա խոսքով' Հայաստանում առկա է զգալի ներուժ գյուղական զբոսաշրջության զարգացման համար: «Մենք քայլ ենք անում ոչ միայն գյուղական, այլև ագրո զբոսաշրջության բնագավառում, որը մի փոքր ավելին է, քան ուղղակի այցելությունը գյուղական վայրեր: Ագրոտուրիզմի էությունը կայանում է նրանում, որ զբոսաշրջիկը ներգրավվում է գյուղական աշխատանքներում' բերքահավաք, հողի հետ աշխատանք և այլն: Այդ ուղղությամբ աշխատանքներ տարվում են նաև միջազգային կազմակերպությունների հետ համագործակացության միջոցով»,-ասաց Մեխակ Ապրեսյանը' նշելով, որ գյուղական համայքներում սեմինար-քննարկումներ են անցկացվում զբոսաշրջության զարգացման հնարավորությունների, ոլորտի օգուտների վերաբերյալ մարդկանց իրազեկվածությունը բարձրացնելու համար:

«Նորարարական գյուղական զբոսաշրջության խթանում» ծրագիրը համաֆինանսավորվում է Եվրոպական միության կողմից 472 հազար 923 եվրո գումարի չափով: Ծրագրի մեկնարկը տրվել է 2013 թվականի նոյեմբերին և կտևի 18 ամիս: