Բաքուն չի ապահովել հայկական պատվիրակության ընդունելությունը

ԱՊՀ անդամ երկրների զինված ուժերի գլխավոր շտաբերի պետերի կոմիտեի 2014թ. նիստին մեկնող հայկական պատվիրակության այցը Բաքու չեղյալ է հայտարարվել: Պատճառն այն էր, որ ադրբեջանական կողմը չէր ցուցաբերել պատրաստակամություն' ապահովելու հայկական կողմի ընդունելությունը: Այդ կապակցությամբ ՀՀ պաշտպանության նախար արությունը մամուլի հաղորդագրություն է տարածել: «ԱՊՀ անդամ երկրների զինված ուժերի գլխավոր շտաբերի պետերի կոմիտեի 2014թ. նիստի նպատակն էր քայլեր ձեռնարկել, որոնք պետք է ուղղված լինեին տարածաշրջանում վստահության ամրապնդմանը: ՀՀ պաշտպանության նախարարությունը նախատեսել էր, որ հայկական զինված ուժերի պատվիրակությունը Բաքվում պետք է մասնակցի վերոնշյալ հանդիպմանը: Պատվիրակության երթուղին կազմելիս տարանցիկ գոտի է ընտրվել Մոսկվան եւ պատվիրակության անդամները ապրիլի 7-ին ՌԴ մայրաքաղաքում էին:

Թեպետ ԱՊՀ Պաշտպանության նախարարների խորհրդի քարտուղարությունը, հրավերին զուգահեռ պաշտոնական ծանուցում էր ուղարկել Ադրբեջանի պաշտպանության նախարարությանը, սակայն հյուրընկալող կողմը որեւէ կերպ չի հաստատել եւ ցուցաբերել պատրաստակամություն ու հետաքրքրություն' ապահովելու հայկական պատվիրակության ընդունելությունը: Նման վերաբերմունքի հետեւանքով հայկական պատվիրակության այցը Բաքու չեղյալ է հայտարարվել»: