Տարածաշրջանում քիմիական զենք չկա, սակայն ժամկետանց սպառազինության առկայությունը մտահոգիչ է

Առաջիկա երեք օրվա ընթացքում Երևանում Արևելյան Եվրոպայի 25 երկրների ներկայացուցիչներ կքննարկեն քիմիական զենքի կոնվենցիայի իրականացման գործընթացներն ու ընթացակարգերը: Մասնակիցները կքննարկեն, թե ի՞նչ խնդիրներ կան քիմիական զենքի առնչությամբ տարբեր երկրներում և ինչպե՞ս համատեղ հաղթահարել դրանք' ստեղծելով նեղ տարածաշրջանային համագործակցություն: Թեպետ մեր տարածաշրջանում այդպիսի խնդիրներ չկան, սակայն քիմիական զենքի կոնվենցիան իրականացնում է նաև մեկ այլ գործառույթ և վերահսկում է երկակի նշանակության տարրերի շրջանառություն: Կոնվենցիան սահմանում է քիմիական տարրերի որոշակի քանակություն, և յուրաքանչյուր երկիր ներկայացնում է հաշվետվություն, թե քիմիական նյութերի ինչ քանակ է գնվել: Այդ առումով Երևանում կարևորում են այդ քննարկումն ու կոնվենցիայի դրույթների պահպանումը: «Հայաստանում երկակի տարրերի հետ կապված խնդիրներ չկան, սակայն հաշվի առնելով տարածաշրջանային խնդիրները, առկա է ժամկետանց սպառազինության և ռազմամթերքի խնդիր, և դրանից ազատվելու անհրաժեշտություն է զգացվում»,- «Արմենպրես»-ի հետ զրույցում ասաց Քիմիական զենքի կոնվենցիայի իրականացման ՀՀ ազգային մարմնի նախագահ Սամվել Մկրտչյանը' հավելելով, որ եռօրյա հանդիպման նպատակն է քննարկել առկա բոլոր խնդիրներն ու գտնել լուծումներ, որը պետք է ամրագրվի համաձայնագրով:

Սա քիմիական զենքի կոնվենցիայի Արևելյան Եվրոպայի երկրների ազգային մարմինների ներկայացուցիչների 13-րդ տարածաշրջանային հանդիպումը, որը կազմակերպել է ՀՀ ԱԳ նախարարության, Քիմիական զենքի կոնվենցիայի իրականացման ՀՀ ազգային մարմինն ու Քիմիական զենքի արգելման կազմակերպության քարտուղարությունը: Քիմիական զենքի կոնվենցիան միջազգային եզակի պայմանագրերից է, որը նպատակ ունի զանգվածային ոչնչացման տեսակներից մեկը' քիմիական զենքը ոչ միայն արգելել, այլև գործընթաց իրականացնել եղած պաշարների ոչնչացման համար: