Անցած շաբաթվա ընթացքում տարածաշրջանում գրանցվել է 3 բալ և ավելի ուժգնությամբ 7 երկրաշարժ

Սեյսմիկ պաշտպանության ծառայության դիտացանցը մայիսի 1-ից 7-ն ընկած ժամանակահատվածում տարածաշրջանում գրանցել է 3 բալ և ավելի ուժգնությամբ 7 երկրաշարժ: Երիկրաշարժերից 6-ը գրանցվել են Թուրքիայի տարածքում. դրանցից 4 երկրաշարժ` 3-ից 4 բալ ուժգնությամբ, տեղի է ունեցել Վան քաղաքի մոտակայքում: Մայիսի 2-ին և 3-ին 3 բալ ուժգնությամբ ստորգետնյա ցնցման էպիկենտրոնները համապատասխա նաբար գտնվել են Հորասան քաղաքից 31 կմ դեպի հարավ-արևելք և Ագրի քաղաքից 32 կմ դեպի հյուսիս-արևելք: Մայիսի 6-ին նույն ուժգնությամբ երկրաշարժ է գրանցվել Լեռնային Ղարաբաղում` Քարվաճառ քաղաքից 14 կմ դեպի հարավ-արևելք:

Տարածաշրջանից դուրս նույն ժամանակահատվածում գրանցվել է 6 և ավելի մագնիտուդով 6 երկրաշարժ: Մայիսի 1-ին Խաղաղ օվկիանոսի հարավում` Նոր Կալեդոնիա կղզուց դեպի արևելք տեղի ունեցած երկրաշարժի ուժգնությունը կազմել է 6.1 մագնիտուդ: Մայիսի 4-ին նույն ուժով երկրաշարժ է գրանցվել Ֆիջի կղզիների տարածքում: Մայիսի 2-ին ինդոնեզական Մոլուքյան կղզիների հատվածում գրանցվել է 6 մագնիտուդով սեյսմիկ իրադարձություն: Նշված մագնիտուդով հաջորդ սեյսմիկ իրադարձությունը տեղի է ունեցել Ճապոնիայի մայրաքաղաք Տոկիոյից 98 կմ դեպի հարավ-արևելք: Ստորգետնյա ցնցումները զգացվել են ինչպես Տոկիոյում, այնպես էլ 28 պրեֆեկտուրաներում: Նշված երկրաշարժերի հետևանքով զոհեր և ավերածություններ չկան: Մայիսի 5-ին Թաիլանդի հյուսիսում գրանցվել է 6 մագնիտուդով սեյսմիկ իրադարձություն, որի էպիկենտրոնը գտնվել է Չիանգրայ գավառի համանուն քաղաքից 27 կմ դեպի հարավ: Երկրաշարժի հետևանքով զոհվել է 1 մարդ, վիրավորվել ավելի քան 20-ը, կան ավերածություններ, այդ թվում` բուդդայական տաճարներ, քանդվել են ճանապարհներ, խաթարվել է հեռահաղորդակցությունը: Ստորգետնյա ցնցումներն զգացվել են նաև մայրաքաղաք Բանգկոկում: Հաջորդ օրը Խաղաղ օվկիա նոսի հարավ-արևելյան մասում` Չիլիի Զատկի կղզուց շուրջ 1500 կմ հեռավորությամբ, տեղի է ունեցել 6.1 մագնիտուդով երկրաշարժ: Մայիսի 7-ին նույն ուժով երկրաշարժ է գրանցվել նաև Պապուա Նոր Գվինեայի ափամերձ գոտում: Երկրաշարժերի հետևանքով զոհեր և ավերածություններ չկան: