Վերջին մեկ շաբաթում Հայաստանում գրանցվել է 3 բալ ուժգնությամբ 1 երկրաշարժ

Սեյսմիկ պաշտպանության ծառայության դիտացանցը մայիսի 8-ից մինչև 14-ը Հայաստանի Հանրապետության տարածքում գրանցել է 3 բալ ուժգնությամբ մեկ երկրաշարժ: Այն տեղի է ունեցել մայիսի 13-ին Մարտունի քաղաքից 24 կմ դեպի հյուսիս-արևմուտք: Նույն ուժգնությամբ ստորգետնյա ցնցում է գրանցվել Լեռնային Ղարաբաղ-Հայաստան սահմանային գոտում' Քարվաճառ քաղաքից 14 կմ դեպի հյուսիս-արևմուտք: Տարածաշրջանում նույն ժամանակահատվածում գրանցվել է 3 բալ և ավելի ուժգնությամբ 4 երկրաշարժ: Մայիսի 8-ին Իրանում' Ահար քաղաքից 26 կմ դեպի հարավ-արևմուտք տեղի ունեցած 4-5 բալ ուժգնությամբ սեյսմիկ իրադարձությունը թույլ զգացվել է ՀՀ Սյունիքի մարզում, մասնավորապես, Մեղրի և Կապան քաղաքներում: Մայիսի 10-ին Թուրքիայի Վան քաղաքի տարածքում գրանցվել է 3 բալ, իսկ մայիսի 13-ին' 4 բալ ուժգնությամբ երկրաշարժ: Մայիսի 12-ին Թուրքիայի Բուլանիկ քաղաքից 45 կմ դեպի հարավ-արևելք գտնվող էպիկենտրոնով երկրաշարժի ուժգնությունը կազմել է 4 բալ:

Տարածաշրջանից դուրս մայիսի 8-ից մինչև 14-ն ընկած ժամանակահատվածում գրանցվել է 6 և ավելի մագնիտուդով 6 երկրաշարժ, որոնք տեղի են ունեցել խաղաղօվկիանոսյան օղակաձև գոտում (Հրե օղակ): Մայիսի 8-ին Մեքսիկայի հարավում (Հերերո նահանգ) տեղի է ունեցել 6.4 մագնիտուդով երկրաշարժ: Ստորգետնյա ցնցումների պատճառով ինչպես Հերերոյում, այնպես էլ մայրաքաղաք Մեխիկոյի բարձրահարկ գրասենյակներից կատարվել է բնակչության տարհանում: Մայիսի 10-ին նույն էպիկենտրոնային գոտում հետևել է 6 մագնիտուդ ուժով երկրաշարժ: Մայիսի 12-ին 6.4 մագնիտուդով սեյսմիկ իրադարձություն է գրանցվել Խաղաղ օվկիանոսի հարավում (Արևելախաղաղօվկիանոսյան բարձրացում): Հաջորդ օրը Պանամայի հարավ-արևմտյան ափամերձ գոտում տեղի ունեցած երկրաշարժն ունեցել է 6.5 մագնիտուդ ուժ: Ստորգետնյա ցնցումները զգացվել են նաև Կոստա Ռիկայում: Մայիսի 14-ին 6.1 մագնիտուդով սեյսմիկ իրադարձություն է գրանցվել Միկրոնեզիայում: Նշված բոլոր երկրաշարժերի հետևանքով զոհեր և ավերածություններ չկան: