Համաշխարհային բանկը տնտեսական զարգացման էական դանդաղում է կանխատեսում ԱՊՀ-ի երկրներում

ԱՊՀ-ի երկրների տնտեսությանը ոչ դյուրին ժամանակներ են սպասում: Այդ մասին ասված է Համաշխարհային բանկի նոր զեկույցում, որը հրապարակվել է հունիսի 10-ին:

«ԱՊՀ-ի զարգացող երկրներում դիտվում է տնտեսական աճի տեմպերի դանդաղում»,- նշվում է հետազոտության մեջ: Նման վիճակի հանգեցրած հիմնական գործոնների թվում դրա հեղինակները նշում են «զարգացման դանդաղումն այն պետություններում, որոնք հիմնական առևտրական գործընկերներն են (տվյալ դեպքում խոսքն ամենից առաջ Ռուսաստանի և Չինաստանի մասին է), աշխարհաքաղաքական վեճերը, մետաղների և հանքանյութերի գների նվազումը»:

ՀԲ-ի մասնագետների տվյալներով՝ «Ղազախստանի, Ուկրաինայի և Ռուսաստանի ամսական արտադրական ցուցանիշները կտրուկ անկում են արձանագրել 2014 թվականի սկզբին»: Բացի այդ, նրանց կարծիքով, «Ռուսաստանում և Չինաստանում ակտիվության նվազումը աճի զսպման է հանգեցրել Ղազախստանում, որի համար այդ պետությունները հիմնական առևտրական գործընկերներ են»: Դրա հետ մեկտեղ նշվում է, որ տարբեր պատճառներով ցուցանիշների նվազում տեղի կունենա տարածաշրջանի գրեթե բոլոր երկրներում:

«Մոտակա հեռանկարում ցուցանիշների վատացումը կապված է Ղազախստանի և Ուկրաինայի տնտեսությունների թուլացման, ինչպես նաև Ռուսաստանում աճի տեմպերի դանդաղման հետ»,- ասված է զեկույցում:

Եթե 2013 թվականին, ըստ նախնական գնահատումների, տարածաշրջանի ՀՆԱ-ի աճի տեմպերը պետք է կազմեին 4 տոկոս, ապա ընթացիկ տարում, ըստ ՀԲ-ի կանխատեսման, դրանք կարող են նվազել մինչև 2,2 տոկոս:

Նման վատացումը երկարատև չի լինելու: Բանկի մասնագետներն այն կարծիքին են, որ արդեն հաջորդ տարի այդ ցուցանիշը կբարձրանա մինչև 4,6 տոկոս, իսկ 2016 թվականին՝ մինչև 4,9 տոկոս:

Ինչ վերաբերում է Ուկրաինային, փորձագետները 2014 թվականին այդ երկրի տնտեսության կտրուկ անկում են կանխատեսում, որն այնուհետև կփոխարինվի աստիճանական վերելքով, հաղորդել է ԻՏԱՌ-ՏԱՍՍ-ը: