ԵԱՀԿ-ն չունի մանդատ և ռեսուրս սահմանային միջադեպերի անկախ հետաքննություն անցկացնելու համար. Անջեյ Կասպրչիկ

Հայ-ադրբեջանական սահմանին լարվածությունը մեծանում է, ինչը վտանգում է Լեռնային Ղարաբաղի հակամարտության խաղաղ կարգավորման գործընթացը: ԵԱՀԿ գործող նախագահի անձնական ներկայացուցիչ, դեսպան Անջեյ Կասպրչիկի գնահատմամբ` սահմանին յուրաքանչյուր զոհը մեծագույն ողբերգություն է ոչ միայն զոհվածի ընտանիքի, այլև հակամարտության կարգավորման հարցով զբաղվող պաշտոնյաների համար: «Վերջերս շփման գծում մի շարք ողբերգական պատահարներ տեղի ունեցան, ինչը փաստում է, որ սահմանին լարվածությունը շատ բարձր մակարդակի վրա է»,- «Արմենպրես»-ի հետ զրույցում ասաց Անջեյ Կասպրչիկը' հավելելով, որ հրադադարի պահպանման մասին պայմանավորվածությունն ուժի մեջ է մտել համաձայնագրի ստորագրմամբ, ինչին կողմերը հասել են ցուցաբերելով ուժեղ քաղաքական կամք: «Հենց դա է պատճառը, որ պատասխանատվություն կրում են կողմերը և նրանք պետք է ապահովեն, որպեսզի զինված ուժերը չխախտեն հրադադարի ռեժիմը շփման գծում: Դրա իրականացման պատասխանատուները, համապատասխանաբար, կողմերի զինված ուժերի հրամանատարներն են և սահմանին յուրաքանչյուր խախտումը փաստում է, որ հրադադարի պահպանման և համաձայնագրի իրականացման բարելավման անհրաժեշտություն է նկատվում: Մենք, իհարկե, մտահոգված ենք, որ այդ խախտումները շարունակական բնույթ են կրում»,- ասաց Կասպրչիկը:

Անդրադառնալով շփման գծում ԵԱՀԿ դիտարկումներին, ԵԱՀԿ գործող նախագահի անձնական ներկայացուցիչն ասաց, որ շփման գծում դիտարկումները կարևոր են, միաժամանակ ԵԱՀԿ-ում անհանգստացած են դիտարկում անցկացնող խմբի անվտանգությամբ: «Քանի որ լարվածությունը մեծանում է, անվտանգության ապահովումը փոքրանում և դիտարկում անցկացնող խմբի անդամներն առաջին գծում իրենց գործունեությունն իրականացնելու համար վտանգում են իրենց կյանքը»,- նշեց ԵԱՀԿ գործող նախագահի անձնական ներկայացուցիչը:

Խոսելով ԵԱՀԿ Մինսկի խմբի գործունեության մասին` Կասպրչիկն ասաց, որ ինչպես Մինսկի խմբի համանախագահները, այնպես էլ ինքը բոլոր ջանքերը գործադրում են որպեսզի պահպանվի հրադադարի ռեժիմն ու ուղիներ գտնեն' հարթելու վերջին միջադեպերի հետևանքները: «Համապատասխան առաջարկությունն արդեն ձևակերպվել է և տրամադրվել կողմերի քննարկմանը: Վերջին հաշվով պատասխանատվությունը կրում են կողմերը, ովքեր ստորագրել են զինադադարի հաստատման համաձայնագիրը»,- կրկնեց Կասպրչիկը:

Անդրադառնալով անընդհատ բարձրացվող մտահոգությանը, որ անհրաժեշտ է ստեղծել անկախ կառույց, որի շրջանակներում պետք է քննարկվեն և ուսումնասիրվեն սահմանային միջադեպերն ու տրվեն համապատասխան իրավական գնահատական` Կասպրչիկն ասաց. «Ներկա դրությամբ ես և իմ թիմը չունենք համապատասխան մանդատ և ռեսուրսներ' սահմանային միջադեպերի վերաբերյալ անկախություն հետաքննություն անցկացնելու համար»:

Նախիջևանի սահմանին ադրբեջանական զինուժի կողմից հրադադարի ռեժիմը խախտելու և պայմանագրային երկու զինծառայողների սպանելու միջադեպից անմիջապես հետո հունիսի 6-ին ՀՀ պաշտպանության նախարար Սեյրան Օհանյանն ընդունել էր ԵԱՀԿ գործող նախագահի անձնական ներկայացուցիչ, դեսպան Անջեյ Կասպրչիկին: Հանդիպման ընթացքում պաշտպանության նախարարը հորդորել է դեսպանին իր լիազորությունների շրջանակներում գործուն քայլեր ձեռնարկել շփման գծում իրավիճակը լիցքաթափելու ուղղությամբ, քանի որ ձևավորված օպերատիվ միջավայրում իրավիճակի ընթացիկ սրումը հղի է ադրբեջանական կողմի համար ծանր հետևանքներ ունենալու հավանականությամբ: Դեսպան Կասպրչիկը հայտնել է իր մտահոգությունը և խոստացել քայլեր ձեռնարկել շփման գծում ներկա իրավիճակի լիցքաթափման ուղղությամբ: