Հայ-ադրբեջանական սահմանին երկու հայ զինծառայող է զոհվել. հայտնի են զոհերի անունները

Լեռնային Ղարաբաղի Հանրապետության զինված ուժերում պայմանագրային զինծառայող է զոհվել' ԼՂՀ քաղաքացի Նարեկ Պողոսյանը: «Արմենպրես»-ի հավաստի տեղեկություններով' ԼՂՀ ուղղությամբ ադրբեջանական զինուժը հերթական դիվերսիոն ներթափանցման փորձն է արել: Հակառակորդը նահանջել է' ունենալով կորուստներ: Հավանաբար դրանով է բացատրվում ադրբեջանական լրատվամիջոցներում առկա ապատեղեկատվությունն այն մասին, իբր, հայկական զինուժը փորձել է ներթափանցել Թովուզի շրջան:

Ադրբեջանական քարոզչամեքենան կրկին իր չհաջողված ոտնձգությունը փորձում է վերագրել հայկական կողմին, իսկ սեփական հասարակության աչքում սխալները սրբագործելու համար ստեր է հորինում' արդարացնելու, թե ինչ հանգամանքներում են մահացել իրենց զինծառայողները: Նրանք այսօր տեղեկություն են հրապարակել, որ ադրբեջանական բանակում զինծառայողը կրակել ու սպանել է ծառայակիցներին, ապա ինքնասպանություն գործել:

Ավելի ուշ ՀՀ պաշտպանության նախարարությունը հաղորդագրություն տարածեց, որում, մասնավորապես ասված է.

«Ստացված օպերատիվ տեղեկության համաձայն' հունիսի 20-ին, հայ-ադրբեջանական սահմանագոտու հարավ-արևմտյան ուղղությամբ տեղակայված զորամասերից մեկի պահպանության տեղամասի մարտական հենակետում մահացու հրազենային գնդակային վիրավորում է ստացել ժամկետային զինծառայող, շարքային Գրիշա Մուրադի Խաչատրյանը (ծնվ. 1994թ., Սիսիանի զ/կ, 2013-1 զորակոչ): Միջադեպի մանրամասները ճշտվում են:

Հայաստանի Հանրապետության պաշտպանության նախարարությունը կիսում է ծանր կորստյան վիշտը և իր զորակցությունն է հայտնում ՀՀ սահմանների անվտանգությունն ապահովելու ընթացքում զոհված զինծառայողի ընտանիքի անդամներին, հարազատներին և ծառայակիցներին»: