«ԵՄ-ի հետ ասոցացման համաձայնագիրը չի վնասի հարևանների հետ Վրաստանի հարաբերություններին». Փանջիկիձե

Եվրամիության հետ ասոցացման մասին համաձայնագիրը չի խանգարի հարևանների, այդ թվում՝ Ռուսաստանի հետ, Վրաստանի առևտրական հարաբերություններին, բայց հնարավոր են առանձին տեխնիկական մանրամասների փոփոխություններ: Այդ մասին հունիսի 20-ին Թբիլիսիում հայտարարել է Վրաստանի արտաքին գործերի նախարար Մայա Փանջիկիձեն:

Եվրամիության հետ ասոցացման համաձայնագրի ստորագրումը նախատեսված է հունիսի 27-ին Բրյուսելում: Ամառվա ընթացքում այն կվավերացվի հանրապետության խորհրդարանի կողմից:

«Մենք ազատ առևտրական հարաբերություններ ունենք մեր հարևանների հետ և այն, որ մենք ազատ առևտրական գոտի ենք բացում Եվրամիության հետ, ոչ մի կերպ չի վնասի մյուս երկրների հետ մեր հարաբերություններին: Մենք ցանկանում ենք պարզաբանել բոլոր նրանց, ովքեր առևտրական հարաբերություններ ունեն մեզ հետ, որ Եվրամիության հետ մեր ասոցացումը որևէ մեկի դեմ ուղղված ակցիա չէ»,-հայտարարել է Փանջիկիձեն լրագրողների հետ կայացած հանդիպմանը:

Դրա հետ մեկտեղ նա պարզաբանել է, որ հարևանների հետ առևտրական հարաբերություններում հնարավոր են առանձին փոփոխություններ, որոնք միայն տեխնիկական բնույթ կկրեն:

«Բնականաբար, կարող են որոշակի փոփոխություններ լինել այդ հարաբերություններում, բայց մեր նպատակն է Վրաստանը վերածել այնպիսի մի վայրի, որտեղ հնարավոր կլինի համագործակցությունը և չի լինի դիմակայություն: Ելնելով դրանից՝ կարող է պահանջվել տեխնիկական մանրամասների փոփոխում, բայց մեր սկզբունքային ցանկությունն այն է, որ Եվրոպայի հետ ասոցացման համաձայնագիրն ու մերձեցումը մեզ էլ ավելի մոտեցնեն մեր հարևաններին և ոչ մի դեպքում չխանգարեն գոյություն ունեցող առևտրական հարաբերություններին»,- ընդգծել է Փանջիկիձեն, հաղորդե է «Նովոստի Գրուզիան»: