Ադրբեջանը սեփական սադրանքները վերագրում է հայերին. Արծրուն Հովհաննիսյանը հերքում է ապատեղեկատվությունը

Ադրբեջանական կողմը շարունակում է լարվածության մեջ պահել հայ-ադրբեջանական սահմանը, հրաժարվում է դիպուկահարներին առաջին գծից հեռացնելուց և իր պետական քաղաքականության հետևանքով առաջացող լարվածության մեջ մեղադրում է հայկական կողմին:

Ադրբեջանական կողմի հերթական սադրանքն ու լարված վիճակը շարունակվում է շուրջ մեկ շաբաթ Թովուզի շրջանում: Նրանք անընդհատ կրակոցներ են արձակում հատկապես խաղաղ բնակիչների ուղղությամբ և փորձում իրավիճակն ապակայունացնել: «Արմենպրես»-ի հետ զրույցում ՀՀ ՊՆ մամուլի խոսնակ Արծրուն Հովհաննիսյանն ասաց, որ թեպետ իրավիճակը լարված է, սակայն հայկական կողմը հսկում է իրավիճակն ու սահմանային անվտանգությունը: «Նրանք կրակում են, ստեղծում են լարված իրավիճակ և միջազգային բոլոր դիտորդների և կազմակերպություններին պահանջներից` հեռացնել դիպուկահարներին առաջին գծից` հրաժարվում են: Վերջին օրերին Թովուզի շրջանում իրավիճակը լարված է և հակառակորդը նպատակաուղղված կրակոցներ է արձակում»,- ասաց Արծրուն Հովհաննիսյանը` հավելելով, որ լարված իրավիճակի միակ պատասխանատուն ադրբեջանական կողմն է, քանի որ Հայաստանի պետական և զինվորական բարձրաստիճան այրերը ոչ միայն հայտարարել են, այլև բազմաթիվ իրավիճակներում ապացուցել, որ ցանկանում են խաղաղություն և մտադրություն չունեն լարվածություն ստեղծել սահմանին:

«Հայկական կողմը եղել և շարունակում է հավատարիմ մնալ այն սկզբունքին, որ պատասխան կրակ է բացում միայն նպատակային կրակոցներին և դիրքերի ուղղությամբ: Անկանոն կրակոցներին հայկական զինված ուժերը չեն պատասխանում»,- ասաց Հովհաննիսյանը:

Ինչ վերաբերում է ադրբեջանական կողմի ներկայացրած տեղեկատվությանը, որ Թովուզի շրջանում հայ-ադրբեջանական սահմանին հրդեհ է գրանցվել, որի նախաձեռնողները հայերն են, Արծրուն Հովհաննիսյանն ասաց, որ ամեն տարի հակառակորդը դիմում է նույն գործողությանն ու սեփական տարածքում հրդեհներ բռնկելով` դրանում մեղադրում է հայերին: Հայկական կողմն այս հարցի ուղղությամբ էլ բազմիցս հայտարարել է, որ պատրաստ է թույլ տալ, որպեսզի փաստահավաք առաքելություններն ուսումնասիրեն հրդեհները` համոզվելու, որ դրանք կամ եղանակով են պայմանավորված, կամ էլ հակառակորդի ձեռքի գործն են: Այս հարցում նույնպես ադրբեջանական կողմը կառուցողականություն չի ցուցաբերում և մերժում է այդ առաջարկությունը:

Հունիսի 25-ին ադրբեջանական զինուժը կրակոցներ էր արձակել Հայաստանի սահմանամերձ Մովսես գյուղի ուղղությամբ: Հակառակորդի զինուժը թիրախավորել է գյուղը, գնդակները հասել են գյուղապետարանի շենքին, եկեղեցուն, դպրոցին: Բարեբախտաբար զոհեր և վիրավորներ չկային: Ադրբեջանական ուժերը վերջին շրջանում հաճախակի են դարձրել հայկական բնակավայրերի ուղղությամբ կրակահերթերն ու նպատակային հարվածները: Նրանք հրադադարի խախտում են թույլ տվել ընդհուպ նույնիսկ Նախիջևանի սահմանին, որի հետևանքով հունիսի 5-ին ՀՀ ԶՈւ պայմանագրային երկու զինծառայողներ էին զոհվել' 1988թ. ծնված Անդրանիկ Սամվելի Եղոյանը և 1992թ. ծնված Բորիս Բենիկի Գասպարյանը:

Հունիսի 24-ին Ղարաբաղա-ադրբեջանական հակամարտ զորքերի շփման գծի արևելյան ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կողմից արձակված կրակոցից մահացու գնդակային վիրավորում է ստացել զինծառայող, 1995թ. ծնված Արմեն Արթուրի Ավետիսյանը: