Թբիլիսիի Սուրբ Էջմիածին եկեղեցու մոտ տեղի ունեցած միջադեպը ազդեցություն չի ունենա հայ-վրացական հարաբերությունների վրա. փորձագետներ

Թեպետ Թբիլիսիի Սուրբ Էջմիածին եկեղեցու մոտ տեղի ունեցած միջադեպը մեկնաբանվել է որպես էթնիկ կրոնական հակամարտություն և կրոնական հողի վրա հարձակում, սակայն թե հայ, թե վրացի փորձագետները համոզված են, որ տեղի ունեցածը կանխամտածված չէր և ուներ բացառապես կենցաղային հիմք: «Արմենպրես»-ի փոխանցմամբ, «Կովկաս» ինստիտուտի փոխտնօրեն, քաղաքագետ Սերգեյ Մինասյանը հրավիրված ասուլիսում շեշտեց, որ Վրաստանում առկա է որոշակի լարվածություն հատկապես հայ և վրաց հոգևորականների շրջանում:

«Վրաստանի պարագայում դա նորմալ է, հաշվի առնելով այն փաստը, որ Վրաստանում այդքան շատ ազգային փոքրամասնություններ են ապրում, որ երկիրն ունի լուրջ հակամարտություն Աբխազիայի և Հարավային Օսիայի հետ, դա ընկալելի է: Ոչ ոք չի բացառում, որ Վրաստանի պատրիարքի և տեղի վիրահայոց թեմի միջև առկա է որոշակի լարվածություն, սակայն եկեղեցու վրա հարձակումը եղել է բացառապես կենցաղային հիմքի վրա»,- ասաց Մինասյանը:

Հանդիպմանը տեսակապով միացած Ռազմավարական հետազոտությունների կենտրոնի փորձագետ Գիորգի Գվիմրաձեն էլ նշեց, որ Վրաստանում քաղաքական մթնոլորտ ձևավորող ուժերը լիբերալ են՝ հեռու քսենոֆոբիայից: Նա հավելեց, որ միջադեպը բացասական և անընդունելի են համարում նաև Վրաստանում և հասարակության մեծ մասը դատապարտել է այն: