Տարածաշրջանում նախորդ շաբաթ գրանցվել է 3 բալ և ավելի ուժգնությամբ 9 երկրաշարժ

Սեյսմիկ պաշտպանության ծառայության դիտացանցը օգոստոսի 7-ից մինչև 13-ն ընկած ժամանակահատվածում Հայաստանի Հանրապետության տարածքում 3 բալ և ավելի ուժգնությամբ երկրաշարժ չի գրանցել: Ինչպես «Արմենպրես»-ին տեղեկացրին ՍՊԾ գործակալությունից, տարածաշրջանում նույն ժամանակահատվածում գրանցվել է 3 բալ և ավելի ուժգնությամբ 9 երկրաշարժ:

Օգոստոսի 6-ին Վրաստանի Դմանիսի քաղաքից 14 կմ հյուսիս-արևմուտք գտնվող էպիկենտրոնով երկրաշարժի ուժգնությունը կազմել է 4-5 բալ: Նույն ուժգնությամբ ստորգետնյա ցնցում է տեղի ունեցել օգոստոսի 8-ին Իրանի հյուսիսում՝ Ահար քաղաքից 32 կմ հարավ-արևմուտք: Այն զգացվել է Հայաստանի հարավում, մասնավորապես, Մեղրի և Ագարակ քաղաքներում' 2-3 բալ ուժգնությամբ: Նույն օրը Իրանում գրանցվել է ևս մի երկրաշարժ, որը տեղի է ունեցել Մերենդ քաղաքից 10 կմ դեպի հարավ-արևելք' 3 բալ ուժգնությամբ: Օգոստոսի 11-ին 3-4 բալ ուժգնությամբ երեք երկրաշարժ է գրանցվել' Թուրքիա-Իրան սահմանա յին գոտում՝ Սարայ քաղաքից 19 կմ դեպի հարավ-արևելք, Թուրքիայում՝ Բիթլիս քաղաքից 63 կմ հարավ-արևելք և Սարիղամիշ քաղաքից 42 կմ դեպի հյուսիս-արևմուտք: Նույն օրվա ընթացքում Թուրքիայում' Բուլանիկ քաղաքից 15 կմ դեպի հյուսիս-արևմուտք, տեղի է ունեցել 4 բալ ուժգնությամբ, իսկ Ադրբեջան-Լեռնային Ղարաբաղի Հանրապետություն սահմանային գոտում' Գյանջա քաղաքից 34 կմ դեպի հարավ-արևելք, 3 բալ ուժգնությամբ երկրաշարժ: Օգոստոսի 12-ին Թուրքիայում գրանցվել է 3 բալանոց ստորգետնյա ցնցում, որի էպիկենտրոնը գտնվում էր Վան քաղաքից 40 կմ դեպի հյուսիս-արևմուտք:

Տարածաշրջանից դուրս նույն ժամանակահատվածում գրանցվել է 6 մագնիտուդով մեկ երկրաշարժ: Այն տեղի է ունեցել օգոստոսի 10-ին Ճապոնիայի հյուսիսարևելյան ափամերձ գոտում, զոհեր և ավերածություններ չկան:

Օգոստոսի 12-ին 5.1 մագնիտուդով սեյսմիկ իրադարձություն է տեղի ունեցել Էկվադորում' մայրաքաղաք Կիտոյից 30 կմ դեպի հյուսիս-արևելք: Երկրաշարժի հետևանքով զոհվել է առնվազն 5 մարդ (այդ թվում' մեկ երեխա), մի քանիսը զոհվել են քարհանքի փլուզման պատճառով, կա 18 տուժած, խաթարվել է հեռահաղորդակցության համակարգը, մեկ ժամով դադարեցվել է մայրաքաղաքի օդանավակայանի աշխատանքը: Ստորգետնյա ցնցումները խուճապ են առաջացրել ոչ միայն մայրաքաղաքում, այլև հարակից տարածքներում: